पुणे : घर मालक अमेरिकेला गेलेले असताना पाच वर्षांपूर्वी केलेल्या चोरीची वॉचमनने आता कबुली दिली आहे. विशेष म्हणजे दुसऱ्यांदा चोरी करत असताना पकडले गेल्यानंतर त्याने आधीच्या चोरीची माहिती पोलिसांना दिली.

या प्रकरणी योगिता प्रभाकर मोडक (वय ७०) यांनी डेक्कन पोलिसांत फिर्याद दिली आहे. त्यानुसार सोमनाथ बंडू बनसोडे (वय ४८, रा. भूगाव) याला अटक झाली. फिर्यादी या प्रभात रस्त्यावर ग्रीनपार्क या सदनिकेत राहतात. फिर्यादी राहत असलेल्या ठिकाणी बनसोडे हा पूर्वी सुरक्षारक्षक म्हणून काम करीत होता.

- व्यापारी महासंघाच्या शिबिरात आढळले कोरोनाबाधित कर्मचारी!​

गुरुवारी (ता.३०) सकाळी साडेसहा वाजता तो बाल्कनीतून घरात घुसत असल्याचे फिर्यादी यांनी पाहिले. फिर्यादी यांनी त्याला अडवण्याचा प्रयत्न केला. त्यामुळे त्याने त्यांच्यावर चाकूने हल्ला केला. यामध्ये फिर्यादीच्या डाव्या हाताला जखम झाली. त्यांनी आरडाओरड केल्यानंतर शेजारचे रहिवाशी मदतीला धावून आले. त्यांनी आरोपीला ताब्यात घेऊन पोलिसांकडे सोपवले. 
फिर्यादी महिला त्यांच्या पतीसमवेत घटनास्थळी राहतात. त्यांचा ऍटोमोबाइल पार्टचा व्यवसाय आहे. त्याचा एक मुलगा अमेरिकेत, तर मुलगी पुण्यातच राहते.

- पुण्यात शनिवारी आणि रविवारी लॉकडाऊनबाबत प्रशासनाने दिले स्पष्टीकरण; वाचा सविस्तर​

पाच वर्षांपूर्वी हे दाम्पत्य अमेरिकेला मुलाकडे गेल्यावर बनसोडेने त्यांच्या घरी चोरी केली होती. यामध्ये सात ते आठ लाखांचे दागिने चोरले होते. मात्र, बनसोडे गेल्या १० वर्षांपासून तेथे कामाला असल्याने त्याच्यावर संशय आला नव्हता, पण तो दुसऱ्यांदा चोरी करत असताना पकडला गेला. पोलिसांनी त्याच्याकडे आधीच्या चोरीबाबत चौकशी केली असता त्याने कबुली दिली. या प्रकरणाचा तपास डेक्कन पोलिस ठाण्याचे सहायक पोलिस निरीक्षक सी. एम. सूर्यवंशी करत आहेत.

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)