पुणे : जिल्ह्यातील थेऊरमधील यशवंत सहकारी साखर कारखान्याला (Yashwant Sugar Factory) आग लागल्याची घटना घडली. विशेष म्हणजे अनेक वर्षांपासून हा कारखाना वादात होता आणि दोन महिन्यापूर्वी हा कारखाना सुरू करण्यासाठी खुद्द राष्ट्रवादीचे अध्यक्ष शरद पवारांनी (Sharad Pawar) बैठक घेतली होती.

पुण्यातील थेऊर येथील यशवंत सहकारी साखर कारखान्याला आग लागल्यानंतर पीएमआरडी अग्निशमन दल घटनास्थळी पोहोचले. त्यानंतर आग विझविण्यात आली. या आगीत कुठलीही जीवितहानी झाली नाही. मात्र, आर्थिक नुकसान झाल्याचा अंदाज आहे.

अनेक दिवसांपासून होता वादात -

शेतकरी रक्कम थकीत असल्याने गेल्या १० वर्षांपासून हा कारखाना बंद असून अनेक वाद होते. पण, दोन महिन्यापूर्वी खुद्द शरद पवार यांनी या कारखान्याला सुरू करण्याबाबत साखर आयुक्त, स्थानिक आमदार, पदाधिकारी यांच्या सोबत बैठक घेतली होती. त्यामुळेच काही लोकांनी आग लावली असल्याचा आरोप केला जात आहे.