गोंदवले (सातारा) - कोरोनाच्या (Corona) दुसऱ्या भागाचा उत्तरार्ध सुरू असतानाच अद्यापही भीती कायम आहे. परिणामी गोंदवले खुर्दमध्ये (Gondawale Khurd) यंदाही गोकुळाष्टमीच्या शोची घंटा वाजणार नसल्याने नाट्यप्रेमींची (Drama) निराशा झाली आहे. कोरोनाच्या पार्श्वभूमीवर गर्दी टाळण्यासाठी सुमारे ७५ वर्षांची नाट्य महोत्सव परंपरा सलग दुसऱ्या वर्षी खंडित झाली आहे.

गोंदवले खुर्दमध्ये समाजप्रबोधनासाठी मनोरंजनातून प्रयत्न झाले. स्वातंत्र्यानंतर सुरुवातीच्या काळात हणमंत कुलकर्णी मास्तरांनी गावातील आकाराम कदम, दादा शेडगे, सीताराम कुलकर्णी, महालिंग खांडेकर, शंकरराव काळे, रामचंद्र पोळ आदींच्या सहकार्याने नाट्य महोत्सवाची मुहूर्तमेढ रोवली. काही काळ बंद पडलेला हा महोत्सव कृष्णराव पोळ, अशोक पोळ, काशिनाथ चव्हाण, काशिनाथ जाधव यांनी १९७४ मध्ये पुन्हा सुरू केला.

याच दरम्यान कामगारांनी पुकारलेल्या बंदमुळे मुंबईतील कामगार गावी आले आणि नाट्य कलेच्या उपक्रमाला मूर्त रूप मिळाले. महादेव घाडगे यांच्या पुढाकाराने १९७७ मध्ये सन्मित्र नाट्य संस्थेची कायदेशीर नोंदणी झाली अन् अर्जुनराव शेडगे, साहेबराव शेडगे, मधुकर गुरव, रमेश खांडेकर, विजय चव्हाण, विजय ढालपे, आनंदराव पोळ, रामभाऊ पोळ यांच्या प्रयत्नातून ग्रामीण भागात पहिल्यांदाच राज्यस्तरीय नाट्य स्पर्धा सुरू झाल्या.

गोकुळाष्टमीनिमित्त दर वर्षी गावात सुरू झालेली नाट्य स्पर्धेची परंपरा नाट्यप्रेमी व ग्रामस्थांनी कायम राखली आहे. मात्र, कोरोनामुळे गेल्या वर्षांपासून ही परंपरा खंडित झाली आहे. गेल्या ७० दशकांपासून सुरू असलेल्या या स्पर्धेला खंड पडल्याने कालाकारांसह नाट्यप्रेमी, प्रेक्षक व ग्रामस्थांचीही निराशा झाली आहे.

गोकुळाष्टमी सप्ताहात मारुती मंदिरात धार्मिक कार्यक्रम साजरे होतातच. शिवाय गावात विविध स्पर्धा, शालेय विद्यार्थ्यांच्या विविध गुणदर्शन, दहीहंडी स्पर्धा असे विविध उपक्रमही राबविण्यात येतात. राज्यस्तरीय नाट्य स्पर्धा हे या महोत्सवातील मुख्य आकर्षण असते. यामध्ये सर्व गावकरी हिरिरीने सहभागी होत असल्याने एकोप्याची भावना वाढीस चालना मिळते. कोरोनाच्या पार्श्वभूमीवर मात्र हे सर्वच कार्यक्रम यंदाही रद्द झाले आहेत.

कोरोनामुळे सलग दुसऱ्या वर्षी नाट्य स्पर्धेची परंपरा खंडित झाल्याने सर्वांचेच मन नाराज झाले असले, तरी आगामी काळात सर्वांच्या सहकार्याने पुन्हा जोमाने गोकुळाष्टमी साजरी करू.

- विजयसिंह चव्हाण, नाट्यकर्मी, गोंदवले खुर्द