सातारा : जिल्ह्यात सध्या पावसाने (Satara Rain) उघडीप दिली असली, तरी अद्यापपर्यंत तरी समाधानकारक पाऊस झालेला नाही. पूर्वेकडील तालुके तर दुष्काळाच्या छायेत आहेत. आतापर्यंत जिल्ह्यात सरासरीच्या ७६.१ टक्केच पाऊस झाला आहे.

तर, प्रमुख सहा धरणांत १०९ टीएमसी उपयुक्त पाणीसाठा झाला आहे. त्यामुळे आगामी काळात शेतकऱ्यांना मोठ्या प्रमाणात पावसाची आवश्यकता आहे, तरच विहिरींच्या पाणीपातळीत वाढ होणार आहे. यावर्षी पावसाचे प्रमाण कमी असून, पूर्व भागात अल्पप्रमाणात पाऊस झाला आहे.

तर, पश्चिमेकडे पावसाचे प्रमाण चांगले असले तरी त्यामध्ये जोर नाही. त्यामुळे आतापर्यंत सरासरीच्या केवळ ७६.१ टक्केच पाऊस झाला आहे. गेल्यावर्षी सरासरीच्या १०३ टक्के पाऊस झाला होता. आता पावसाने उघडीप दिली असली तरी अधूनमधून तुरळक सरी येत आहेत.

सध्या खरीप पिके चांगल्या स्थितीत आहेत. या पिकांना आणखी पावसाची गरज आहे. जून, जुलैमध्ये ३९० मिलिमीटर पाऊस झाला होता. गेल्या तीन महिन्यांत ४३६.९ मिलिमीटर पाऊस झाला आहे. तालुकानिहाय पावसाची आकडेवारी मिलिमीटरमध्ये अशी : सातारा ४५७, जावळी ८११, पाटण ८५९, कऱ्हाड २४२, कोरेगाव १९४, खटाव १४७, माण ११८, फलटण ८९, खंडाळा १३४, वाई ३२८, महाबळेश्‍वर २३१८. या सर्वांची सरासरी ७६.१ टक्के आहे.

जिल्ह्याच्या पूर्व भागात तुरळक पाऊस असल्याने येथे पाणी टंचाई जाणवत आहे. परिणामी, टॅंकरने पाणी पुरवठा केला जात आहे, तर अल्प पावसामुळे चाऱ्याची टंचाई आगामी काळात भासण्याची शक्यता असल्याने दुष्काळ जाहीर करून जनावरांसाठी चारा छावण्या सुरू करण्याची मागणी होत आहे. गेल्यावर्षी आजच्या दिवसांपर्यंत १०३ टक्के पाऊस झाला होता. त्या तुलनेत यावर्षी कमी पाऊस असल्याचे चित्र आहे. दरम्यान, जिल्ह्यातील प्रमुख सहा धरणांत १०९ टीएमसी उपयुक्त पाणीसाठा आहे.

धरणांची स्थिती

धरणाचे नाव - उपलब्ध पाण्याची टक्केवारी

• कोयना - ७८.७०,

• धोम - ८२.९८

• धोम - बलकवडी ८७.३७

• कण्हेर - ७७.३७

• उरमोडी - ६२.२८

• तारळी - ८५.४५.