सातारा : बेडग (ता. मिरज, जि. सांगली) येथील डॉ. बाबासाहेब आंबेडकर यांच्या नावाने असणारी स्वागत कमान (Dr. Babasaheb Ambedkar Welcome Arch) अज्ञातांकडून पाडण्यात आली. या घटनेचा निषेध करण्यासाठी बेडग ते मुंबई असा ‘लाँग मार्च’ आयोजिला आहे.

हा ‘लॉंग मार्च’ काल साताऱ्यात दाखल झाला. या वेळी रिपब्लिकन पक्षाने वाढेफाटा येथे उड्डाणपुलावर ठिय्या आंदोलन केल्यामुळे महामार्गावरील वाहतूक काही काळ विस्कळित झाली. बेडग येथील डॉ. बाबासाहेब आंबेडकर यांची स्वागत कमान पाडल्याच्या निषेधार्थ गावातील आंबेडकरप्रेमी अनुयायांनी आपली घरे बंद करून बेडग ते मुंबई असा ‘लाँग मार्च’ आयोजिला आहे.

हा ‘लाँग मार्च’ गुरुवारी रात्री कऱ्हाडवरून साताऱ्यात दाखल झाला. शुक्रवारी सकाळी रिपाईंचे जिल्हाध्यक्ष अशोक गायकवाड यांच्या नेतृत्वाखाली सुमारे ३०० आंदोलक चालत पुण्याच्या दिशेने निघाले. वाढेफाटा येथील उड्डाण पुलावर गायकवाड यांच्या नेतृत्वाखाली आंदोलकांनी रस्त्यावर ठिय्या आंदोलन करत निषेधाच्या घोषणा देऊन कमान पाडणाऱ्या मनुवादी प्रवृत्तींचा निषेध केला.

या आंदोलनात संघटनेचे उपाध्यक्ष प्रतीक गायकवाड, प्रदेश उपाध्यक्ष अण्णा वायदंडे, युवक आघाडी प्रदेश उपाध्यक्ष स्वप्नील गायकवाड, जिल्हा सरचिटणीस आप्पासाहेब गायकवाड, कामगार आघाडी जिल्हाध्यक्ष नीलेश गाडे आदी उपस्थित होते. हा मार्च पुणे, रायगड करत मुंबईत मंत्रालयाकडे जाणार आहे.

या आंदोलनामुळे महामार्गावरील वाहतूक खोळंबली होती. साताऱ्याचे पोलिस उपअधीक्षक किरण सूर्यवंशी, प्रशिक्षणार्थी उपअधीक्षक अजित कोकाटे, पोलिस निरीक्षक विश्वजित घोडके, धनंजय फडतरे, तसेच सुमारे शंभर ते दीडशे पोलिस कर्मचारी बंदोबस्तासाठी तैनात होते. महामार्गावरील वाहतूक सेवा रस्त्याने वळविण्यात आली. अर्ध्या तासाच्या ठिय्या आंदोलनानंतर आंदोलक पुण्याच्या दिशेने रवाना झाले.