कास : मुख्यमंत्री एकनाथ शिंदे (Eknath Shinde) यांनी दरे येथे दोन तीन तास शेतात काम केले. त्यांनी आपल्या शेतातील हळदीला यंत्राने भर घातली. त्याचबरोबर मत्स्यशेती प्रकल्प, गोशाळा यांनाही भेट देऊन पाहणी केली.

दरम्यान, मुख्यमंत्री शिंदे यांनी दरे गावी (Dare Village) भेटायला आलेल्या सर्व लोकांच्या समस्या ऐकून निवेदन स्वीकारली. जनता दरबार भरवून त्यांनी आलेल्या लोकांच्या समस्याही जाणून घेतल्या. जिल्हाधिकारी जितेंद्र डुडी यांच्यासोबत त्यांनी विविध विकासकामांचा आढावा, तसेच पर्यटन वाढीसाठी आवश्यक बाबी, शेती व रोजगार निर्मिती आदींबाबत माहिती घेतली.

एकनाथ खडसेंसाठी एअर ॲम्ब्युलन्स

माजी विरोधी पक्षनेते एकनाथ खडसे यांना हृदयविकाराचा झटका आल्याचे समजताच मुख्यमंत्री शिंदे यांनी तत्परतेने फोनवरून यंत्रणा हलवत खडसे यांच्यासाठी एअर ॲम्ब्युलन्स उपलब्ध करण्याच्या सूचना संबंधितांना दिल्या. शेतात काम करतानाच राज्यातील परिस्थितीवरही बारीक लक्ष असल्याचे त्यांनी दाखवून दिले.