म्हसवड : चारित्र्याच्या संशयावरून दारुड्या पतीने लाथाबुक्क्याने मारहाण करून पत्नीचा खून केल्याची घटना म्हसवड पोलिस ठाण्यानजीकच्या (Mhaswad Police Station) क्रांती सूर्यनगर कॉलनीत घडली. धोंडिराम नाना पुकळे (वय ४०, रा. पुकळेवाडी, सध्या रा. म्हसवड क्रांती सूर्यनगर) असे संशयिताचे नाव आहे.

दीपाली धोंडिराम पुकळे (वय ३२) असे खून झालेल्या पत्नीचे नाव आहे. शनिवारी (ता. चार) संध्याकाळी नऊ ते रविवारी (ता. पाच) दुपारी तीनच्या दरम्यान ही घटना घडली. याबाबत म्हसवड पोलिस ठाण्यातून मिळालेल्या माहितीनुसार, धोंडिराम नाना पुकळे याने दारूच्या नशेत चारित्र्याचा संशय घेऊन पत्नी दीपालीस लाथाबुक्क्यांनी मारहाण करून व भिंतीवर व व्यायाम करायच्या डंबेलवर आपटून गंभीर जखमी करून ठार मारले.

फरशीवर व भिंतीवर पडलेले रक्त मुलगा निखिल व आयुष यांच्याकडून साफ करून घेऊन पुरावा नष्ट करण्याचा प्रयत्न केला, अशी फिर्याद मृत दीपालीचे वडील आबा कोडलकर यांनी म्हसवड पोलिस ठाण्यात दिली. पोलिसांनी संशयित धोंडिराम याला त्वरित अटक केली. घटनास्थळी दहिवडी येथील पोलिस उपअधीक्षक अश्‍विनी शेंडगे यांनी भेट दिली असून, अधिक तपास सहायक पोलिस निरीक्षक राजकुमार भुजबळ करीत आहेत.