सातारा : सत्तेच्‍या बळावर नगरपालिकेला (Satara Municipality) गैरव्यवहाराचे कुरण बनवत पैसे खाण्‍याचा उद्योग सत्ताधाऱ्यांनी सुरू ठेवला होता. आता काही दिवसच बाकी असल्‍याने आम्‍ही साताऱ्यासाठी काही तरी करत आहोत, असा दिखावा करत सातारा विकास आघाडीने सहानुभूती मिळवण्याचा खटाटोप सुरू केल्‍याची टीका विरोधी पक्षनेते अशोक मोने (Ashok Mone) यांनी पत्रकाव्‍दारे केली आहे.

जनाधार तुटल्‍याने प्रशासकीय मान्यता व निधी नसताना नूतन प्रशासकीय इमारतीच्या भूमिपूजनाचा घाट घातल्‍याची टीका करत श्री. मोने यांनी कितीही दिखावा केला तरी सत्ता बदल होणारच, असा विश्‍‍वासही पत्रकात व्‍यक्‍त केला आहे. या पत्रकात म्‍हटले आहे की, गेल्या साडेचार वर्षांत पालिकेतील भ्रष्ट कारभाराने कळस गाठला असून निवडणूक जवळ आल्याने सत्तेचा स्वार्थ डोळ्यासमोर ठेऊन साताऱ्यात नारळ फोडण्याचा सपाटा सत्ताधाऱ्यांनी लावला आहे.

पालिकेच्या ज्या नूतन इमारतीचे भूमिपूजन थाटात करून आम्ही किती काम करतोय, हे सत्ताधारी सांगत आहेत, त्या प्रशासकीय इमारतीला अद्याप कोणतीही तांत्रिक मान्यता मिळालेली नाही. सत्ता मिळाल्यापासून सत्ताधाऱ्यांनी फक्‍त लूटच केली असून काही दिवस उरल्याने आम्ही कसा विकास करतोय, हे दाखवण्याचा ते केविलवाणा प्रयत्न स्वप्नपूर्तीच्‍या नावाखाली सुरू असल्‍याची टीका करत नगराध्‍यक्षा माधवी कदम (Mayor Madhavi Kadam) यांच्‍या अनुपस्‍थितीबाबत श्री. मोने यांनी पत्रकाव्‍दारे प्रश्‍‍न उपस्‍थित केले आहेत.

...'कसं गं सांगू’ म्‍हणायची वेळ आली नसती

गेल्या साडेचार वर्षांत सातारा विकास आघाडीने खाबूगिरीऐवजी विकासकामे केली असती तर आज ‘काय बाय सांगू, कसं गं सांगू’ म्हणण्याची वेळ तुमच्‍यावर आली नसती. तुमची कामे आणि तुमचा विकास काय आहे, हे सातारकरांना कळून चुकले आहे. त्यामुळे कितीही नारळ फोडा आणि कितीही भूलथापा मारा, निवडणुकीत सत्तापालट करून सातारकर तुम्हाला धडा शिकवतील, असा इशारा श्री. मोने यांनी पत्रकात दिला आहे.