महाबळेश्वर : धक्कातंत्राचा वापर करून आज नगरपालिकेने रे गार्डन परिसरातील गाळ्यांसमोर करण्यात आलेले ओट्यांचे पक्के बांधकाम जेसीबीच्या मदतीने उद्‌ध्वस्त केले. पालिकेच्या या कारवाईमुळे शहरात खळबळ माजली आहे.

बस स्थानकासमोर पालिकेचे रे गार्डन शॉपिंग सेंटर आहे. त्यातील काही दुकानदारांनी दुकानासमोर रस्त्यांवर अतिक्रमण करून पक्के ओटे बांधले होते. या अतिक्रमणाविरोधात अनेक तक्रारी होत्या; परंतु आजवर राजकीय हस्तक्षेपामुळे कारवाई केली जात नव्हती; परंतु पालिकेच्या प्रशासक तथा मुख्याधिकारी पल्लवी पाटील यांनी या अतिक्रमणाबाबत स्पष्ट भूमिका घेऊन ते वारंवार काढण्याच्या सूचना केल्या होत्या. या सूचनांकडे दुकानदारांनी फारसे गांभीर्याने पाहिले नाही. त्यामुळे आज धक्कातंत्राचा वापर करून मुख्याधिकाऱ्यांनी कारवाईचे आदेश दिले. कर निरीक्षक भक्ती जाधव यांनी सूरज किर्दत व अरुण वायदंडे या अधिकाऱ्यांसोबत कारवाईची मोहीम फत्ते केली.

जेसीबीच्या मदतीने घेऊनच हे पथक रे गार्डन शॉपिंग सेंटर येथे पोचले. त्यांनी वेळ वाया न घालविता तातडीने दुकानासमोरील पक्के बांधकामातील ओटे उद्‌ध्वस्त करण्यात आले. टॅक्सी स्टॅण्डपासून सुरू झालेली ही मोहीम आंबेडकर चौकापर्यंत पोचली.पालिकेची विशेष मोहीम सुरू होताच काही दुकानदारांनी आपले अतिक्रमण स्वतः काढण्यास सुरुवात केली, तर काहींना या पथकाने वेळ दिला नाही. त्यामुळे काही दुकानदारांचे ओटे उद्‌ध्वस्त झाले. या वेळी या परिसरात कारवाई पाहण्यासाठी नागरिकांची मोठी गर्दी झाली होती.