कऱ्हाड : राष्ट्रवादीचे नेते हसन मुश्रीफ (Hasan Mushrif) यांच्या घरावर, ऑफिसवर ईडीनं छापा टाकला. परंतु, गेल्या काही दिवसांपूर्वीही इन्कम टॅक्सनं छापा टाकला होता. अनिल देशमुख, संजय राऊत यांच्यावरही ईडीनं कारवाई केली. मात्र, ते बाहेर आले. मुश्रीफ त्याला कायदेशीर मार्गानं उत्तर देतील, असा विश्वास व्यक्त करत माजी सहकारमंत्री आमदार बाळासाहेब पाटील (Balasaheb Patil) यांनी मुश्रीफांची पाठराखण केली.

आमदार पाटील म्हणाले, 'एखाद्या व्यक्तीला टार्गेट करायचं. आरोप मोठा करुन त्याला समाजातून उठवायचं अशा पद्धतीचं राजकारण सध्या राज्यात सुरू आहे. देशात काही लोकांच्या सांगण्यावरून केंद्र व राज्यातील यंत्रणा काम करत आहेत. ज्येष्ठ नेते यशवंतराव चव्हाण यांच्या पुरोगामी महाराष्ट्रात हे चालणार नसून ते लोकशाहीच्या दृष्टीनं मारक आहे.'

छत्रपती शिवाजी महाराज (Chhatrapati Shivaji Maharaj) यांच्यावर राज्यपाल टीका करत आहेत. महात्मा जोतिबा फुले यांनी शिक्षणाची दारं खुली केली. त्यांच्याबाबतीत एक मंत्री (चंद्रकांत पाटील) भिक मागून शिक्षण दिलं, असं ते म्हणाले. शिवाय, एका मंत्र्यानं शिवाजी महाराजांचा एकेरी उल्लेख केला. त्याबद्दल भाजपचे नेते बोलायला तयार नाहीत. केवळ महापुरुषांचा अपमान करण्याचं काम सुरु आहे. प्रादेशिक असमतोल वाढत चालला आहे. व्देषावर आधारित काम सुरु आहे. आरोप मोठा करायचा आणि विरोधी पक्षाच्या नेत्यांना अटक करायची, असं सत्र सुरु आहे. विरोधकांचा आवाज दाबण्याचं काम त्यांच्याकडून सुरु आहे, असा आरोपही आमदार पाटील यांनी केला.