वहागाव : गणेशोत्सवातील विसर्जन मिरवणुकीचा बंदोबस्त आटोपून सारेच जिल्ह्यातील पोलिस दल निवांत झाले असतानाच कऱ्हाड तालुक्यातील वनवासमाची येथे खुनानंतर (Murder Case) एकाला जाळून त्याच्या मृतदेहाची विल्हेवाट लावण्याचा प्रकार पहाटेच उघडकीस आला.

सहायक पोलिस निरीक्षक राहुल वरुटे यांनी मृतदेहाशेजारी आढळलेल्‍या पेट्रोल बिलावरून (Petrol Bill) या खुनाचा उलगडा केला. हातात काहीही ठोस पुरावा नसताना केवळ तांत्रिक तपासाच्या आधारावर मंजुनाथला ताब्यात घेऊन चौकशी सुरू केली. तशी ती रिस्कच होती.

मात्र, पोलिसी खाक्या दाखविताच मंजुनाथ सारे घडाघडा बोलला. जिल्ह्यातील पहिला असा गुन्हा असेल ज्यामध्ये खून झालेल्याची ओळख पटण्यापूर्वी पोलिसांनी संशयितांना ताब्यात घेतले होते. त्यांच्याकडून खून झालेल्या व्यक्तीची ओळख पटविण्यात आली. त्याचे नाव केशवमूर्ती असल्याचे पोलिसांसमोर आले.

केशवमूर्ती हा मंजुनाथचा चुलत मेव्हणा असल्याचेही तपासात पुढे आले. सरकारी नोकरी लावतो, असे सांगून मंजुनाथसहीत तिघांनी केशवमूर्तीकडून पाच लाख रुपये घेतले होते. त्यामुळे त्याच्या खुनाचा कट रचल्याचे तपासात पुढे आले आहे. मंजुनाथला बंगळुरातून तर जखमी प्रशांतला पुण्यातून एकाचवेळी अटक करण्यात आली, तर प्रशांत बटवालला विजापुरातून काल रात्री अटक केली.

केशवमूर्तीचा खून हुबळीच्या दरम्यान झाल्याचा संशय आहे. मात्र, त्याचा मृतदेह वनवासमाचीत जाळण्याचा प्रयत्न झाला. तो जाळताना झालेल्या गडबडीत मंजुनाथच्या खिशातील पेट्रोलची पावती घटनास्थळी पडली अन् तीच पावती संशयितांची कर्दनकाळ ठरली.