सातारा : साताऱ्यात होणाऱ्या लोकनेते बाळासाहेब देसाई (Balasaheb Desai) यांच्‍या प्रस्‍तावित स्‍मारकाच्‍या (आयलँड)अनुषंगाने वाद सुरू असतानाच त्‍याबाबतची छायाचित्रे (थ्रीडी इमेज) समाजमाध्‍यमांवर व्‍हायरल झाली.

या तीन प्रकारच्‍या छायाचित्रांमुळे स्‍मारकाच्या अनुषंगाने हालचाली सुरू असल्‍याचे समोर येत आहे. याबाबत पालिकेतील वरिष्‍ठांशी संपर्क साधला असता, त्‍यांनी तशा प्रकाराची कोणतीही कार्यवाही सद्य:स्‍थितीत पालिकास्‍तरावर झाली नसल्‍याची माहिती दिली.

गेल्‍या आठ दिवसांपासून पोवई नाका परिसरात होणाऱ्या लोकनेते बाळासाहेब देसाई यांच्‍या प्रस्‍तावित स्‍मारक (आयलँड) वरून वादंग सुरू आहे. या स्‍मारकास विरोध दर्शवत शिवप्रेमी तसेच उदयनराजे समर्थकांनी याबाबतची निवेदने जिल्‍हा प्रशासनास दिली आहेत.

याच अनुषंगाने आमदार शिवेंद्रसिंहराजे भोसले यांनीही प्रतिक्रिया नोंदवत लोकनेत्‍यांचे स्‍मारक इतरत्र कोठेही होऊ शकते, अशी टिप्पणी केली होती. या प्रस्‍तावित स्मारकाच्या अनुषंगाने वादंग सुरू असतानाच पालकमंत्री शंभूराज देसाई यांनी पोवई नाका परिसरातच लोकनेते बाळासाहेब देसाई यांचे स्‍मारक होणार, अशी स्‍पष्‍ट भूमिका जाहीर केली.

ही भूमिका जाहीर करत असतानाच त्‍यांनी याबाबतची कार्यवाही करण्‍यासाठी जिल्‍हाधिकारी जितेंद्र डुडी, पोलिस अधीक्षक समीर शेख, पालिकेचे मुख्‍याधिकारी अभिजित बापट व इतर प्रशासकीय अधिकाऱ्यांची बैठक घेतली. या बैठकीतील तपशील समोर आला नसला तरी स्‍मारकाच्‍या अनुषंगाने कार्यवाही गतिमान झाल्‍याचे संकेत मिळत होते.

या सर्व पार्श्वभूमीवर प्रस्‍तावित स्‍मारकाची छायाचित्रे रविवारी समाज माध्‍यमांवर व्‍हायरल झाली. या छायाचित्रांमध्‍ये तीन प्रकारच्‍या छायाकृती आहेत. यामुळे प्रस्‍तावित स्‍मारकाच्‍या अनुषंगाने पालकमंत्री शंभूराज देसाई यांच्‍या पातळीवर गतिमान कार्यवाही सुरू असल्‍याचे स्‍पष्‍ट होत आहे.