औंध : घाटमाथा ते पुसेसावळी रस्त्यावर त्रिमलीनजीक दुचाकी व चारचाकी गाडीचा समोरासमोर झालेल्या भीषण अपघातात 45वर्षीय दुचाकी स्वार जागीच ठार झाले. दरम्यान अपघातानंतर दुचाकी गाडी जाग्यावरच जळून खाक झाली.

याबाबत घटनास्थळ व औंध पोलीस स्टेशनमधून मिळालेली अधिक माहिती अशी, कैलास बाजीराव गायकवाड वय 45हे वर्धन अँग्रो कारखान्यातील आपली डयुटी संपवून रायगाव ता. कडेगाव या आपल्या गावी निघाले होते . ते त्याठिकाणी इलेक्ट्रिशियन म्हणून कामाला होते.

कारखान्यापासून दिड ते दोन किलो मीटर अंतरावर आपल्या दुचाकी गाडी क्रमांक MH10CS471वरून जात असताना समोरुन येणाऱ्या MH10CN902या अल्टो800या गाडीने समोरासमोर जोरदार धडक देत कैलास गायकवाड यांची दुचाकी सुमारे शंमर फुट फरफटत नेली यामध्ये त्यांचा उजवा पाय गुडघ्यापासून खाली पुर्णपणे तुटून पडला होता तसेच मेंदूला ही जखम झाली होती.त्यामुळे त्यांचा जागेवरच मूत्यू झाला तर दुचाकी ही जाग्यावर पेटून जळून खाक झाली तर चारचाकी गाडीने ही दोन तीन कोलांट उडया खाल्या व रस्त्याच्या बाजूकडील खडड्यात जाऊन चारचाकी गाडी पडली.

दरम्यान घटनास्थळी स्थानिक ग्रामस्थ व पोलीस पोहचण्या अगोदरच चारचाकी गाडीतील ड्रायव्हर व अन्य व्यक्ती तिथून पसार झाल्या होत्या. कैलास गायकवाड यांच्या अपघाती मुत्त्यु मुळे कारखाना परिसरात शोककळा पसरली होती. सदर घटनेची नोंद औंध पोलीस स्टेशनमध्ये झाली असून अधिक तपास बी.एन.जाधव करीत आहेत.