मसूर (जि.सातारा) ः वाळू माफियांविरुद्ध पोलिसांनी येथे कारवाई करून वाळू उत्खनानाच्या ठिकाणी छापा टाकला. त्यामध्ये वाळूसह जेसीबी व इतर वाहनांसह सुमारे 40 लाख 51 हजारांचा मुद्देमाल जप्त करण्यात आले. याप्रकरणी उंब्रज पोलिस ठाण्यात दोन वेगवेगळे गुन्हे दाखल झाले आहेत. तुषार यादव (वय 27, मूळ गाव काले, हल्ली रा. संतोषीमातानगर मसूर), अमित चंद्रकांत पारवे (रा. संतोषीमातानगर, मसूर), आकाश अधिक चव्हाण (रा. चिखली), विनोद कांबिरे (रा. कांबिरवाडी) अशी संशयितांची नावे असल्याची माहिती पोलिसांनी दिली.
 
पोलिसांची माहिती अशी : मसूर परिसरात ओढ्यातून बेकायदेशीर वाळू उपसा होत असल्याची माहिती उंब्रज पोलिस ठाण्याचे सहायक पोलिस निरीक्षक अजय गोरड यांना मिळाली. त्या अनुषंगाने एका पथकाने मध्यरात्री बाराच्या सुमारास वाण्याचीवाडी गावच्या हद्दीत ओढ्याचे पात्रात तीन ब्रास वाळू भरलेला डंपर (एमएच 50 एन 5049), वाळू उत्खनन करीत असलेला एक जेसीबीद्वारे (एमएच 50 सी 2485) तुषार यादव, अमित पारवे हे दोघे जण अवैध वाळू उत्खनन करताना दिसून आले. त्याच्यावर छापा टाकून त्यांच्या ताब्यातील वाहने, वाळूसह 40 लाख 51 हजार 500 किमतीचा मुद्देमाल जप्त करण्यात आला. संशयिताविरोधात शासकीय परवान्याशिवाय वाळू चोरून उत्खनन चोरीचा गुन्हा नोंद करण्यात आला आहे. या गुन्ह्याचा अधिक तपास सहायक फौजदार सतीश मयेकर करीत आहेत. दुसऱ्या पथकाने मध्यरात्री दोनच्या सुमारास मसूरच्या हद्दीत मसूर ते चिखली रस्त्यावरील शिवाजी हायस्कूलसमोर विनोद कांबिरे व आकाश चव्हाण ट्रॅक्‍टर ट्रॉलीद्वारे वाळूची वाहतूक करीत असताना सापडले. त्याप्रकरणी संबंधितावर गुन्हा दाखल करण्यात आला आहे.

त्याचा तपास पोलिस उपनिरीक्षक प्रवीण जाधव करत आहेत. वाळूमाफिया विरोधात उंब्रज पोलिस ठाण्याने वरिष्ठांच्या मार्गदर्शनाखाली कठोर मोहीम राबवली. अजय गोरडे यांचे पथकातील पोलिस कर्मचारी सहायक फौजदार गणेश भोसले, राजेंद्र साळुंखे दत्तात्रय लवटे अभिजित पाटील, अमोल देशमुख, अमोल निकम, स्वप्नील मोरे यांनी कारवाईत भाग घेतला.

काळजी घ्याच... तुमच्या मुलाचाही जाऊ शकतो जीव

प्रेमविवाहानंतर दोन महिन्यांनी ते आले एकत्र अन् गावात झाला राडा