म्हसवड (जि. सातारा) : पंढरपूर-सातारा रस्त्यावर म्हसवडजवळच्या पिलीव घाटात एसटी बसवर दगडफेक करणाऱ्या टोळीतील आठपैकी पाच संशयितांना माळशिरस पोलिसांनी ताब्यात घेतले आहे. 

मंगळवारी (ता. 19) रात्री अकराच्या सुमारास सातारा-पंढरपूर रस्त्यावर पिलीव घाटात कोरेगाव आगाराच्या सातारा-सोलापूर बसवर सात ते आठ युवकांकडून दगडफेक करण्यात आली होती. यामध्ये बसच्या काचा फुटून बसचालक जखमी झाला होता. तसेच एक दुचाकीस्वारही जखमी झाला होता. यामुळे मोठा गोंधळ उडाला होता. दोन्ही बाजूची वाहने थांबविण्यात आली होती. म्हसवड व माळशिरस पोलिस ठाण्याचे पोलिस तातडीने घटनास्थळी दाखल झाले. परंतु, तोपर्यंत संशयित पसार झाले होते.

भारत माता की जय, वंदे मातरम्‌च्या जयघोषाने दुमदुमला मालवणचा किनारा  

याबाबत एसटी चालक जिवराज सुभाष कदम (रा. पांढरवाडी, ता.खटाव, जि. सातारा) यांनी माळशिरस पोलिस ठाण्यात फिर्याद दिली होती. सहायक पोलिस निरीक्षक शशिकांत शेळके तपास करत होते. तपासादरम्यान पोलिसांनी आटपाडी, म्हसवड, नातेपुते, वेळापूर, पंढरपूर या परिसरातील अनेक गावांतून गोपनीय माहिती काढली. त्यामध्ये देवापूर (ता. माण) व आटपाडी (जि. सांगली) येथील संशयितांनी हा गुन्हा केल्याची माहिती मिळाली. त्यानंतर आटपाडी तालुक्‍यातील राजेवाडी तलावाच्या परिसरात मासे खरेदीचे व्यापारी असलेचे भासवून देवापूर (ता. माण) व राजेवाडी येथे सापळा लावला. 

महाबळेश्वरपाठोपाठ कोयनाही होणार पर्यटनाचे डेस्टिनेशन; गृहराज्यमंत्र्यांचा पुढाकार

गुन्ह्यामध्ये आठ संशयित निष्पन्न झाले असून, त्यापैकी पाच जणांना पोलिसांनी ताब्यात घेतले आहे. त्यातील दोन संशयित अल्पवयीन आहेत. सोलापूर ग्रामीणच्या पोलिस अधीक्षक तेजस्वी सातपुते यांच्या मार्गदर्शनाखाली अतिरिक्त पोलिस अधीक्षक अतुल झेंडे, अकलूजचे पोलिस अधिकारी निरज राजगुरू, माळशिरस पोलिस ठाण्याचे सहायक पोलिस निरीक्षक शशिकांत शेळके, हवालदार पंडित मिसाळ, दत्ता खरात, समाधान शेंडगे, सोमनाथ माने, सतीश धुमाळ, अन्वर आतार हे या कारवाईत सहभागी होते. 

संपादन : बाळकृष्ण मधाळे