उंब्रज (जि.सातारा) : लॉकडाउनचा फायदा घेत उंब्रजसह परिसरातील नदीपात्रातून अवैध वाळूउपसा सुरू असून दिवस-रात्र नदीपात्रातून जेसीबीच्या साह्याने वाळूउपसा सुरू आहे. महसूल विभागाकडून त्याकडे डोळेझाक होत असल्याने परिसरातील शेतकरी-ग्रामस्थांतून आश्‍चर्य व्यक्त होत आहे. 

सध्या जिल्ह्यात कोरोनाच्या पार्श्वभूमीवर लॉकडाउन सुरू आहे. त्यामुळे वाळू चोरट्यांना वाळू उपशासाठी मोकळे रान सापडले आहे. त्याचा फायदा घेत उत्तरमांड, तारळी, कृष्णा नदीपात्रातून रात्रंदिवस बेकायदा वाळूउपसा सुरू आहे. लाखो रुपयांची वाळूविक्री केली जात आहे. वाळूचे डेपो मारले आहेत. अवैध वाळू डेपोवर महसूल विभाग कारवाई करणार का, असा सवाल नागरिकांतून उपस्थित होत आहे. काही वाळू चोरट्यांची येथील शासकीय कर्मचाऱ्यांशी उठबस असल्याने या वाळू चोरट्यांचे खबरीच कर्मचारी असल्याचे स्थानिकांतून बोलले जात आहे. त्यातच कोरोनामुळे गावाच्या सीमा सील केल्याने महसूल विभाग गावात येत नाही. याचाच फायदा घेत वाळू चोरट्यांना खुलेआम वाळू उपशासाठी रान मोकळे झाले आहे. याकडे महसूल विभाग डोळेझाक करत आहे. बक्कळ पैसा कमवण्यासाठी वाळू चोरटे नदीपात्राची अक्षरश: चाळण करत आहेत. नदीपात्र खरवडून काढले आहे. या अवैध वाळू उपसामुळे पावसाळ्यात नदी काठावरील शेतकऱ्यांची राने वाहून जात आहेत. याबाबत ग्रामस्थांनी तक्रार केली असता संबंधित चोरट्यांकडून तक्रारदारास दम देत आहेत. याकडे महसूल विभाग जाणूनबुजुन दुर्लक्ष करत असून महसूल विभागाला अगोदरच मालामाल केल्याची चर्चा नागरिकांत आहे. 

मोठ्या कारवाया गुलदस्त्यात... 

जिल्ह्यात अनेक ठिकाणी अवैध वाळू उपसावर धडक कारवाई होत आहे. परंतु, उंब्रज परिसरातील वाळू चोरट्यांवर आत्तापर्यंत कोणतीच मोठी कारवाई झाली नाही. चिरीमिरीची कारवाई करत येथील महसूल विभाग पाठ थोपटून घेत आहे. यापूर्वी अनेक कारवाया झाल्या. परंतु, कागदावर किरकोळ कारवाई येतात. अनेक मोठ्या कारवाया या गुलदस्त्यातच राहिल्याची चर्चा परिसरातील शेतकरी व नागरिकांत आहेत. 

लढा कोरोनाशी : लाखाे लाेकांसाठी सातारा जिल्हा परिषदेने घेतला महत्त्वपूर्ण निर्णय

महाराष्ट्राच्या नंदनवनात अशीही घुसमट...