ढेबेवाडी (जि. सातारा) : विभागातील निगडे व कदमआवाड (मंद्रुळकोळे, ता. पाटण) येथे जनावरांच्या शेडला लागलेल्या आगीत सहा जनावरे होरपळून जखमी झाली. निगडेत शुक्रवारी दुपारी अडीचच्या सुमारास तर कदम आवाडात आज सकाळी साडेअकराच्या सुमारास आगीची घटना घडली. आगीत शेडसह चारा व अन्य साहित्य जळून खाक झाल्याने संबंधित शेतकऱ्यांचे मोठे नुकसान झाले आहे. 

काल दुपारी अडीचच्या सुमारास निगडेतील पवनचक्कीच्या वीजवाहिन्या वाऱ्यामुळे एकमेकांना चिटकल्याने खाली वाळलेल्या गवतात ठिणग्या पडल्या आणि क्षणात आगीचा भडका उडाला. तेथील महादेव बाळकू तेटमे यांच्या घराच्या दिशेने आग निघाल्याने ग्रामस्थ व तेटमे कुटुंबांनी प्रसंगावधान राखून आग रोखली. मात्र, वाऱ्यामुळे जवळच असलेल्या त्यांच्या जनावरांच्या शेडकडे आग पसरली आणि वाळलेल्या चाऱ्यामुळे संपूर्ण शेड आगीत सापडले. ग्रामस्थांनी प्रयत्नांची शिकस्त करून शेडमध्ये बांधलेल्या बैल, म्हैस व रेड्याच्या गळ्यातील दोर कापले; परंतु तोपर्यंत तिन्ही जनावरे गंभीररीत्या भाजली होती. आग लागताच शेडमधील एक रेडकू बाहेर पळाल्याने सुदैवाने बचावल्याचे ग्रामस्थांनी सांगितले. 

रंगपंचमी खेळून केलेली अंघोळ ठरली अखेरची; सातारच्या यशराजचा कोल्हापुरातील खणीत बुडून मृत्यू

ढेबेवाडी-सणबूर रस्त्यालगत असलेल्या कदम आवाड (मंद्रुळकोळे) येथे आनंदराव शंकर कदम यांच्या जनावरांच्या शेडला आज सकाळी साडेअकराच्या सुमारास आग लागली. शेडजवळच्या गवत व कडब्याच्या गंजीनी पेट घेतल्याने क्षणात आग डोंब उसळला. घटनास्थळी धावलेल्या ग्रामस्थांनी पेटत्या शेडमध्ये घुसून आत अडकलेल्या दोन म्हशी व रेडकाची सुटका केली. मात्र, तिन्ही जनावरे भाजल्याने जखमी झाली आहेत. जिल्हा परिषद सदस्य रमेश पाटील यांनी तातडीने घटनास्थळी पाण्याचा टॅंकर पाठवला. आग नियंत्रणात आणण्यात यश आल्यामुळे सुदैवाने आजूबाजूची घरे बचावली. आगीत शेडमधील बॅरल, घागरी व अन्य साहित्य जळून खाक झाले. आजूबाजूची झाडेही आगीत होरपळली आहेत. मंडल अधिकारी प्रवीण शिंदे यांच्या मार्गदर्शनानुसार तलाठी संजय काशीद, महसूल कर्मचारी सोमनाथ पाटील यांनी पंचनामा केला. 

कऱ्हाड, मलकापूरची डेंजरझोनच्या दिशेने वाटचाल?; बाधितांच्या आकड्यात झपाट्याने वाढ

मायणी अभयारण्यात एक हेक्‍टर वनसंपदा जळून खाक; आगीवर नियंत्रण मिळविण्यासाठी वनविभागाचे शर्थीचे प्रयत्न

संपादन : बाळकृष्ण मधाळे