ढेबेवाडी (जि. सातारा) : एका बाजूला तुंबलेल्या गटारातील पाण्याचे रस्त्यावर साचलेले तळे तर दुसरीकडे ग्रामपंचायतीने गावातील कचरा टाकण्यासाठी तयार केलेला उकिरडा आणि त्यातूनच वाट शोधत निघालेले विद्यार्थी-रुग्ण व नागरिक अशी विचित्र कसरत येथील ग्रामीण रुग्णालयासमोरून बाजारपेठेत जाणाऱ्या रस्त्यावर बघायला मिळत आहे. ग्रामपंचायत त्यावर काही ईलाज शोधणार की नाही, असा सवालही या निमित्ताने उपस्थित होत आहे. 

येथील ग्रामीण रुग्णालयाच्या समोरून बाजारपेठेत गेलेल्या रस्त्याच्या परिसरात प्राथमिक व माध्यमिक शाळा असून विद्यार्थी-रुग्ण व नागरिकांची तेथून सतत वर्दळ बघायला मिळते. गेल्या काही वर्षांपासून येथे कचऱ्याच्या विल्हेवाटीच्या समस्येने डोके वर काढले आहे. कचरा टाकायचा कुठे, असा प्रश्न ग्रामपंचायतीसमोर असल्याने ग्रामीण रुग्णालयाच्या कंपाउंडजवळ रस्त्याकडेला मोठा खड्डा खोदून त्यांनी उकिरडा तयार केला आहे. 

त्यातून वारंवार ओसंडणारा कचरा हा नेहमीच चर्चेचा विषय बनलेला असतो. अलीकडे तर एका बाजूला हा उकिरडा आणि दुसऱ्या बाजूस तुंबलेल्या गटारामुळे रस्त्यावर साचलेले दुर्गंधीयुक्त पाण्याचे तळे यामुळे विद्यार्थी, नागरिक व रुग्णांची ये-जा करताना कसरत होत आहे. साचलेल्या पाण्यातून वाहने ये-जा करताना अंगावर चिखलयुक्त पाणी उडून वादावादीचे प्रसंगही घडत आहेत. ग्रामपंचायत त्यावर काही ठोस ईलाज शोधणार की नाही, असा सवालही या निमित्ताने उपस्थित होत आहे. 

हे पण वाचा- Breaking News : अपहरण प्रकरणी सेनेच्या नेत्यावर गुन्हा दाखल

बाजारपेठेतील हा प्रमुख रस्ता असल्याने सतत पादचारी व वाहनांची वर्दळ असते. तेथे वारंवार उद्‌भवणाऱ्या या समस्येवर ग्रामपंचायतीने तातडीने ठोस उपाय शोधायलाच हवा. 

-आण्णा कारंडे, ग्रामस्थ 

संपादन : बाळकृष्ण मधाळे