दहिवडी (जि.सातारा) : कोरोनाच्या सोबतीने आलेल्या लॉकडाउनमुळे शेतकऱ्यांचे कंबरडे मोडले. हातातोंडाशी आलेली पिके अक्षरश: फेकून द्यावी लागली. मात्र, कांद्यासोबतच महत्त्वाचे असलेले टोमॅटो हे नगदी पीक शेतकऱ्यांना तारण्याची शक्‍यता निर्माण झाली आहे.
 
लॉकडाउन जाहीर झाल्यानंतर सर्वच क्षेत्रांबरोबर शेती क्षेत्रालाही त्याची झळ पोचली. वाहतूक बंद झाल्यामुळे शेतकऱ्यांचा माल जाग्यावरच सडला. विशेषतः कांदा, कलिंगड, डाळिंब, टोमॅटो यांची लाली दर पडल्यामुळे फिकी पडली. कलिंगड, टोमॅटो हे शेतकऱ्यांनी फेकून दिली. आहे त्या अवस्थेत या फळपिकांच्या बागा शेतकऱ्यांनी सोडून दिल्या. मात्र, मागील काही दिवसांपासून टोमॅटोच्या दरात हळूहळू वाढ होऊ लागली आहे. सुरुवातीला 50 रुपयांना असणारे कॅरेट शंभर, दीडशे करत दोनशे रुपयांपर्यंत पोचले आहे. आवक वाढल्यामुळे दरात चढ-उतार होण्याची शक्‍यता आहे. मात्र, दर कॅरेटला शंभरच्या पुढे दर राहिला तर शेतकऱ्यांचा भांडवली खर्च निघू शकतो. दोनशेच्या पुढे दर मिळाल्यास बरा पैसा मिळू शकतो. निसर्गाने साथ दिल्यास कॅरेटला पाचशेपर्यंतही दर जाऊ शकतो, अशी शक्‍यता आहे. लागणीपासून 70 दिवसांनंतर फड सुरू होऊन तो नंतर दीड ते पावणेदोन महिने चालतो. चांगले उत्पादन निघाले तर एका एकरात 1800 ते 2000 कॅरेट उत्पन्न निघू शकते. त्यामुळे सर्व खर्च जाऊन 200 रुपये कॅरेटला मिळाले तर शेतकऱ्यांना परवडते. 

दराची चिंता न करता मी दरवर्षी टोमॅटो लावतो. चांगले उत्पादन काढण्यासाठी मी नेहमी प्रयत्नशील असतो. त्यामुळे दर मिळाला तर बऱ्यापैकी उत्पन्न मिळते. यंदा चांगला दर मिळण्याची अपेक्षा आहे. 
 - कैलास मगर, प्रगतशील शेतकरी, मलवडी 

मलवडी परिसरात मोठ्या प्रमाणात टोमॅटोचे उत्पादन घेतले जाते. येथून सोलापूर, कोल्हापूरसह पुणे, मुंबई व परराज्यांतही टोमॅटो विक्रीस जातो. सुरवातीला टोमॅटोला दर नव्हता. पण, काही काळ दर वाढून पुन्हा तो खाली आला आहे. पुढील काळात दर वाढण्याची शक्‍यता आहे. 
- अनिल हराळे, व्यापारी व वाहतूकदार 
 

लढा कोरोनाशी : लाखाे लाेकांसाठी सातारा जिल्हा परिषदेने घेतला महत्त्वपूर्ण निर्णय

महाराष्ट्राच्या नंदनवनात अशीही घुसमट...