कराड : कराड (जि. सातारा) तालुक्यातील १२ ग्रामपंचायतींसाठी (Karad Gram Panchayat Voting) आज रविवारी सकाळी मोठ्या उत्साहात मतदानास प्रारंभ झाला. कोणत्याही गावात अनुचित प्रकार घडू नये, यासाठी मोठा पोलिस बंदोबस्त तैनात करण्यात आला आहे.

कराड तालुक्यातील रेठरे बुद्रुक, भोसलेवाडी, बानुगडेवाडी, गोसावेवाडी, हेळगाव, कांबीरवाडी, पिंपरी, शेळकेवाडी, येणपे, येवती, सयापूर, टेंभू या ग्रामपंचायतींसाठी आज सकाळी मोठ्या उत्साहात मतदानास प्रारंभ झाला. त्यासाठी २७० कर्मचाऱ्यांची नेमणूक करण्यात आली आहे.

निवडणूक लागेल्या गावांसाठी निवडणूक निर्णय अधिकारी नेमले आहेत. त्यांच्याकडे कोणत्याही गावात काही कारणाने मतदान यंत्रात बिघाड झाल्यास त्या केंद्रावर तात्काळ यंत्रे उपलब्ध व्हावी यासाठी जादा यंत्रे देण्यात आली आहेत.

दरम्यान, कोणत्याही गावात अनुचित प्रकार घडू नये यासाठी पोलीस उपाधीक्षक अमोल ठाकूर, कराड तालुका पोलीस निरीक्षक विजय पाटील यांच्या मार्गदर्शनाखाली मोठा पोलिस बंदोबस्त तैनात करण्यात आला आहे. संवेदनशील गावात स्वतंत्र पथकामार्फत मतदान प्रक्रियेवर नियंत्रण ठेवले जात आहे.