मुंबई : २०१७ साली सूर्यमालेच्या बाहेरून आलेल्या एका वस्तूने जगभरातील शास्त्राज्ञांच्या आणि सामान्यांच्याही भुवया उंचावल्या होत्या. अशाप्रकारे बाहेरच्या जगातून येऊन पृथ्वीच्या इतक्या जवळ पोहोचणारी Oumuamua ही पहिली वस्तू आहे असं किमान त्या वेळी तरी वाटत होतं; मात्र तो समज आता खोटा ठरतो आहे.

अमेरिकेच्या अवकाश संशोधन संस्थेने नुकत्याच जाहीर केलेल्या एका अभ्यासातून असे समोर आले आहे की, Oumuamua च्या तीन वर्षे आधी म्हणजेच २०१४ साली आणखी एक वस्तू अशाप्रकारे पृथ्वीवर आली होती. पपुआ न्यू गिनिका येथे या वस्तूने पेट घेतला व अवकाशातील हा कचरा प्रशांत महासागरात कोसळला. ही वस्तू आपल्या सूर्यमालेच्या बाहेरील असल्याचे हावर्ड विद्यापीठाच्या दोन संशोधकांनी सांगितले होते. त्यांच्या म्हणण्याला आता अमेरिकी संशोधन संस्थेने दुजोरा दिला आहे.

२०१४ साली आलेली ही वस्तू आंतरतारकीय अवकाशातून पृथ्वीवर आलेली तसेच अन्य तारकमालेतून येऊन पृथ्वीवर धडकणारी पहिली वस्तू होती. ही वस्तू पृथ्वीपासून काही अंतरावर असली तरीही अवकाशातील कचरा महासागरात टाकण्याएवढी मोठी होती.

हावर्ड विद्यापीठामध्ये अवकाशभौतिकीचे शिक्षण घेणारा विद्यार्थी अमिर सिरज आणि विज्ञानाचे कनिष्ठ प्राध्यापक अब्राहम लोएब यांना या संशोधनाचे श्रेय देण्यात आले आहे. अशाप्रकारेच परक्या तारकामालिकेतून आलेली वस्तू याआधी पृथ्वीवर आल्याचे कळल्यानंतर मला आश्चर्याचा धक्का बसला. समुद्राचा तळ खरवडून आपल्याला त्या वस्तूचे काही अवशेष मिळू शकतात का याची माहिती मी घेतो आहे, असे अमिरने सांगितले. बाहेरून पृथ्वीवर येणाऱ्या वस्तूंचा शोध घेण्यासाठी वापरल्या जाणार्‍या पद्धतींमुळे योग्य निष्कर्ष निघण्यास विलंब झाला.