Blue Ghost Moon Video : चंद्राच्या कक्षेतून फिरणाऱ्या ब्लू घोस्ट लँडरने चंद्राचा नेत्रदीपक व्हिडिओ पाठवला असून, त्यातून या खडकाळ आणि विवरांनी भरलेल्या पृष्ठभागाचे सखोल निरीक्षण करता येत आहे. फायरफ्लाय एअरोस्पेसच्या या ऐतिहासिक मोहिमेअंतर्गत ब्लू घोस्ट २ मार्च रोजी चंद्रावर उतरण्यास सज्ज आहे.

१०० किमी उंचीवरून चंद्राचा अद्भुत नजारा

स्पेसएक्स फाल्कन ९ रॉकेटच्या मदतीने १५ जानेवारी २०२५ रोजी प्रक्षेपित झालेल्या या लँडरने १३ फेब्रुवारीपासून चंद्राच्या कक्षेत भ्रमण सुरू केले आहे. हे यान चंद्राच्या मारे क्रिसियम (Mare Crisium) नावाच्या सपाट खाचरात २ मार्च रोजी भारतीय वेळेनुसार सकाळी ७:०४ वाजता उतरणार आहे.

नासाच्या कमर्शिअल लुनार पेलोड सर्व्हिसेस (CLPS) मोहिमेचा हा एक भाग असून, ब्लू घोस्ट चंद्रावर १० वैज्ञानिक उपकरणे पोहोचवणार आहे.

चंद्राच्या दुर्लक्षित भागाचा अभ्यास

ब्लू घोस्टने पाठवलेल्या नव्या दृश्यांमध्ये चंद्राच्या पृथ्वीवरून न दिसणाऱ्या भागाचाही समावेश आहे, ज्यामुळे चंद्राच्या भूगोलाबाबत वैज्ञानिकांना नव्या महत्त्वपूर्ण माहिती मिळण्याची शक्यता आहे.

ही मोहीम १४ दिवस चालणार असून, या काळात चंद्राच्या धुळीच्या (Regolith) रचनेचा तसेच सौर वाऱ्याचा पृथ्वीच्या चुंबकीय क्षेत्राशी होणाऱ्या परिणामाचा अभ्यास केला जाईल. ही माहिती नासाच्या भविष्यातील आर्टेमिस मोहिमेसाठी उपयुक्त ठरणार आहे, ज्याद्वारे चंद्रावर मानवाला पुन्हा पाठवले जाणार आहे.

चंद्र मोहिमांमध्ये वाढ

ब्लू घोस्टच्या व्हिडिओच्या काही तासांपूर्वीच स्पेसएक्सने इंट्यूटिव्ह मशीनच्या "अथेना" लँडरचे यशस्वी प्रक्षेपण केले. २०२५ मध्ये स्पेसएक्सच्या नेतृत्वाखाली हे तिसरे चंद्र लँडर प्रक्षेपण होते. याशिवाय, जपानी कंपनी इस्पेसचे "हाकुटो-R2" हे यान देखील चंद्राच्या दिशेने प्रवास करत आहे. त्यामुळे २०२५ हे वर्ष चंद्र मोहिमांसाठी ऐतिहासिक ठरण्याची शक्यता आहे. चंद्राच्या या नव्या मोहिमा भविष्यातील मानवी वसाहतींसाठी महत्त्वाचा टप्पा ठरणार आहेत.