Google Search : गुगल सर्च इंजिन लवकरच मोठा बदल होणार असून गुगल सर्च इंजिनला आर्टिफिशियल इंटेलिजन्सची जोड मिळणार आहे. गुगलचे सीईओ सुंदर पिचाई यांनी याबाबत वक्तव्य केलं आहे. आता गुगल सर्च इंजिनमध्ये टाईप केलं तर चॅटजीपीटीसारखी उत्तरं मिळणार आहेत.

गुगल हे जगातील सर्वात मोठे सर्च इंजिन आहे. गेल्या 20 वर्षांपासून प्रत्येक छोटी-मोठी माहिती मिळवण्यासाठी गुगल सर्चचा वापर केला जात आहे. यूएसमधील या टेक फर्मचा मुख्य व्यवसाय 'सर्च इंजिन' आहे आणि मूळ कंपनी अल्फाबेटच्या कमाईचा निम्मा वाटा याचा आहे.

दोन दशकांपासून सर्च इंजिन जगतात अधिराज्य गाजवणाऱ्या कंपनीपुढे ChatGpt मुळे नवं आव्हान निर्माण झालं होतं. आर्टिफिशियल इंटेलिजन्स (एआय) आधारित चॅटबॉट्स गुगलच्या सर्च इंजिन व्यवसायाला अडचणीत आणू शकतात. मात्र कंपनीने वेळीच हा धोका ओळखला.

द वॉल स्ट्रीट जर्नलने याबाबतचं वृत्त प्रकाशित केलं आहे. ChatGpt कडून तगडं आव्हान मिळाल्यानंतर गुगलने हे पाऊल उचलल्याचं बोललं जातंय. आर्टिफिशियल इंटेलिजन्समुळे वेगवेगळ्या प्रकारच्या शोधांना प्रतिसाद देण्याच्या गुगलच्या क्षमतेमध्ये वाढ होणार असल्याचं सुंदर पिचाई यांनी सांगितलंय. अलीकडेच कंपनीने Bard AI चॅटबॉट सादर केला होता. आता कंपनी ते गुगल सर्च इंजिनमध्ये जोडण्याची तयारी करत आहे.

मायक्रोसॉफ्टने देखील यावर्षाच्या सुरुवातीलाच आपल्या सर्चच इंजिन Bing मध्ये ChatGPT जोडून रिलॉन्च केलं होतं. यामुळे युझर्सना सर्चसोबतच चॅटबॉटचाही अनुभव मिळत आहे. यानंतर गुगलनेही मायक्रोसॉफ्ट आणि ChatGPT ला टक्कर देण्यासाठी BARD लॉन्च केलं. परंतु गुगलच्या या चॅटबोटला Bing एवढी लोकप्रियता मिळाली नाही. याचं मोठं कारण चॅटबोटची उपलब्धता हे आहे.