Whatsapp New Feature : जगातील सर्वाधिक वापरली जाणारी मेसेजिंग अ‍ॅप्लिकेशन WhatsApp आता ग्रुप कॉलिंग अनुभव आणखी सुधारण्याच्या तयारीत आहे. WhatsApp लवकरच एक नवं आणि उपयुक्त फीचर ‘Raise Hand’ (हात वर करा) आपल्या अ‍ॅपमध्ये सादर करणार आहे. याच्या मदतीने ग्रुप व्हॉईस किंवा व्हिडीओ कॉलमध्ये सहभागी होणारे वापरकर्ते आपली बोलण्याची इच्छा इतरांना सिग्नलद्वारे दाखवू शकतील, जेणेकरून संभाषणात अडथळे येणार नाहीत आणि संवाद अधिक शिस्तबद्ध व सुसंगत होईल.

WABetaInfo च्या अलीकडील अहवालानुसार, हे फीचर सध्या व्हॉट्सअ‍ॅपच्या Android 2.25.19.7 बीटा व्हर्जनमध्ये चाचणी टप्प्यात आहे. यामध्ये वापरकर्ते Raised Hand (हात वर करणारा इमोजी) वापरून इतर सहभागी सदस्यांना सूचित करू शकतात की ते काहीतरी बोलू इच्छित आहेत. यामुळे अनेक जण एकाच वेळी बोलण्याचा त्रास टळेल आणि संवादात सुसंगती राहील.

व्हर्च्युअल मिटिंग्स, ऑनलाइन क्लासेससाठी फायदेशीर

हे फीचर विशेषतः ऑनलाइन मीटिंग्स, वर्च्युअल क्लासरूम्स, कौटुंबिक गप्पा किंवा व्यावसायिक चर्चांमध्ये उपयुक्त ठरेल. एकाच वेळी अनेक जण बोलू लागल्यास संवाद विस्कळीत होतो, परंतु 'Raise Hand' फीचरमुळे प्रत्येकाला आपली संधी मिळेल आणि संवाद चांगला होईल.

Zoom आणि Microsoft Teams प्रमाणे व्हॉट्सअ‍ॅपमध्येही नवा अनुभव

जरी ‘Raise Hand’ फीचर Zoom किंवा Microsoft Teams सारख्या व्यासपीठांवर पूर्वीपासून उपलब्ध असले, तरी व्हॉट्सअ‍ॅपसारख्या लोकप्रिय मेसेजिंग अ‍ॅपमध्ये हे प्रथमच येत आहे. यामुळे व्हॉट्सअ‍ॅपचा वापर व्यवसायिक आणि शैक्षणिक गरजांसाठी आणखी उपयुक्त ठरेल.

सध्या बीटा टप्प्यात, लवकरच सर्वांसाठी उपलब्ध

सध्या हे फीचर विकासाच्या अंतिम टप्प्यात असून, प्रथम बीटा वापरकर्त्यांना उपलब्ध करून दिलं जाणार आहे. चाचणी पूर्ण झाल्यानंतर, लवकरच हे अपडेट सर्व व्हॉट्सअ‍ॅप वापरकर्त्यांसाठी रोलआउट केलं जाईल. आता ग्रुप कॉलिंगमध्ये गोंधळ नाही फक्त Raise Hand करून आपली संधी मिळवा