झिवामे ही ई-कॉमर्स वेबसाईट महिलांमध्ये विशेष लोकप्रिय आहे. महिलांची अंतर्वस्त्रे, लाऊंज वेअर, अ‍ॅक्टिव्ह वेअर आणि इतर कपड्यांचे कित्येक ऑप्शन या वेबसाईटवर उपलब्ध आहेत. मात्र, सध्या एका वेगळ्या कारणामुळे ही साईट चर्चेत आली आहे. एका सायबर हल्ल्यात या साईटवरील यूजर्सचा डेटा हॅकर्सनी चोरल्याचं स्पष्ट झालं आहे.

ऑनलाईन विक्रीसाठी उपलब्ध

हॅकर्सनी झिवामेच्या (Zivame Data hack) ग्राहकांचा डेटा ऑनलाईन विक्रीसाठी उपलब्ध केला आहे. यामुळेच या सायबर हल्ल्याची माहिती समोर आली. इंडिया टुडेने याबाबतचे वृत्त प्रसिद्ध केले आहे. या वेबसाईटचा वापर मुख्यत्वे महिलांकडून अंतर्वस्त्रांच्या खरेदीसाठी करण्यात येतो, त्यामुळे चोरलेली ही माहिती अतिशय संवेदनशील असल्याचं म्हटलं जात आहे.

१५ लाख भारतीय महिलांचा डेटा

झिवामेच्या ग्राहक असलेल्या १५ लाख भारतीय महिलांचा डेटा या सायबर हल्ल्यात चोरण्यात आल्याचं सांगण्यात येत आहे. यामध्ये यूजर्सचे नाव, ईमेल आयडी, मोबाईल नंबर, पत्ता अशा सर्व खासगी माहितीचा समावेश आहे. झिवामे ही रिलायन्स रिटेलच्या मालकीची ई-कॉमर्स वेबसाईट आहे.

५०० डॉलर्सना उपलब्ध

धक्कादायक बाब म्हणजे, ही माहिती (Zivame users data) केवळ ५०० डॉलर्समध्ये विक्रीसाठी उपलब्ध आहे. हॅकिंग टीममधील एका व्यक्तीने इंडिया टुडेच्या टीमशी संवाद साधला. त्यावेळी त्याने हा डेटा विकण्यासठी क्रिप्टोकरन्सीच्या माध्यमातून ५०० डॉलर्सची मागणी केली. या व्यक्तीने सॅम्पल म्हणून १,५०० यूजर्सची माहिती देखील शेअर केली.

मिळालेल्या माहितीनुसार, याच हॅकर्सच्या ग्रुपने यापूर्वी सुमारे ७ मिलियन लिंक्ड-इन यूजर्सचा डेटा हॅक केला होता. तसेच, रेंटोमोजो या फर्निचर रेंटिंग स्टार्टपच्या १.२१ मिलियन यूजर्सचा डेटाही यांनीच चोरून ऑनलाईन विक्रीसाठी उपलब्ध केला होता.