नंदुरबार : जांभीपाडा (ता.नंदुरबार) येथे मासेमारी करीत असताना नाल्याला अचानक पूर आल्याने दोन तरुण पुराच्या पाण्यात वाहून गेल्याची घटना काल (ता.१५) घडली. (Latest Marathi News)

जांभीपाडा (ता. नंदुरबार) येथील गुरुदीप दिलीप पाडवी (वय २८) व गणेश मोतू पाडवी (वय ४०) हे काल (ता.१५) दुपारी साडेतीनच्या सुमारास गावाजवळ असलेल्या नाल्याच्या फरशी पुलावर मासे पकडण्यासाठी गेले होते.

नाल्यात मासे पकडत असताना अचानक नाल्याला पूर आल्याने ते दोघे पाण्याच्या प्रवाहासोबत वाहून गेले. तेव्हा आकाश दिलीप पाडवी हे त्यांना वाचविण्यासाठी पाण्यात उतरले. मात्र, तेही पाण्यात वाहू लागले. त्यांना इतर लोकांनी काठीच्या साह्याने बाहेर काढून वाचविले. मात्र, गुरुदीप पाडवी व गणेश पाडवी हे पाण्यात वाहून गेले. त्यांचा पाण्याच्या प्रवाहाच्या दिशेने शोध घेतला. परंतु ते मिळून आले नाहीत. आकाश पाडवी यांच्या माहितीवरून उपनगर पोलिस ठाण्यात मीसिंगची नोंद करण्यात आली आहे. हरवलेली व्यक्तिमिळून आल्यास उपनगर पोलिस ठाण्यात संपर्क करण्याचे आवाहन पोलिस विभागातर्फे करण्यात आले आहे.