धुळे : कोरोनातील दोन वर्षांच्या खंडानंतर मुंबई- आग्रा महामार्गावरील लळिंग (ता. धुळे) कुरणातील ऐतिहासिक लांडोर बंगला येथे रविवारी (ता. ३१) आंबेडकरी अनुयायींचा जनसागर लोटला. भीमस्मृती यात्रेनिमित्त दिवसभर विविध कार्यक्रम पार पडले. (Bhima Smriti Yatra Crowd After 2 Years dhule Latest Marathi News)

न्यायालयीन कामकाजानिमित्त येथे आलेल्या भारतरत्न डॉ. बाबासाहेब आंबेडकर यांनी १९३८ मध्ये लांडोर बंगल्यास भेट दिली होती. त्यांच्या या आठवणींना उजाळा देण्यासाठी २९ वर्षांपासून लांडोर बंगलास्थळी दरवर्षी ३१ जुलैला भीमस्मृती यात्रा भरते.

दोन वर्षे कोरोनाचा काळ सोडला तर ही यात्रा नियमित होत होती. यंदाही रविवारी भीमस्मृती यात्रा भरली. भारतरत्न डॉ. बाबासाहेब आंबेडकर ३१ जुलै १९३८ मध्ये न्यायालयीन कामकाजासाठी शहरात आले होते.

त्या वेळी त्यांनी लांडोर बंगला येथे मुक्काम केला होता. त्यांची आठवण स्मरणात राहावी, यासाठी माजी प्राचार्य स्व. जे. जी. खैरनार यांच्यासह काही कार्यकर्त्यांनी भीमस्मृती यात्रा भरविण्यास सुरवात केली. हा उपक्रम अखंडित सुरू आहे.

रॅलीत आमदार सहभागी

आंबेडकरी चळवळीचे हजारो कार्यकर्ते, महिला अनुयायांनी लांडोर बंगल्यातील भारतरत्न डॉ. बाबासाहेब आंबेडकर पुतळ्याला अभिवादन केले. आमदार फारुक शाह यांनी आंबेडकरी नेत्यांसह मोटारसायकल रॅलीने लांडोर बंगला गाठत डॉ. आंबेडकर पुतळ्याला अभिवादन केले.

आंबेडकरी नेते वाल्मीक दामोदर, ज्येष्ठ नेते एम. जी. धिवरे, रिपब्लिकन पक्षाचे जिल्हाध्यक्ष शशिकांत वाघ, प्रेमानंद अहिरे, आबा खंडारे, राजू शिरसाट, प्रभाकर जाधव, आनंद सैंदाणे, मणीबाबा खैरनार, आनंद लोंढे, आसिफ शहा, निजाम सय्यद, अफसर शाह, संजय बैसाणे, राहुल खैरनार आदी उपस्थित होते. यात्रोत्सवानिमित्त भीमगीतांसह अन्य कार्यक्रम झाले. अनेकांनी कुटुंबासह हजेरी लावली.