Nandurbar Crime News : वागदी (ता. नवापूर) येथे किरकोळ कारणावरून झालेल्या वादात सख्ख्या भावाचा खून करण्यात आला. या धक्कादायक घटनेमुळे परिसरात एकच खळबळ उडाली आहे. (brother murder brother in nandurbar crime news)

पोलिस सूत्रांकडून मिळालेल्या माहितीनुसार नरेश गावित व विश्वास गावित हे दोघे सख्खे भाऊ असून, लहान भाऊ विश्वास याने यापूर्वी गावातील महिलेस मारहाण केल्याने त्याच्यासह मोठा भाऊ नरेश यावरही गुन्हा दाखल होऊन न्यायालयात खटला सुरू आहे. मोठा भाऊ नरेश याने विश्वास याला ‘तू महिलेस मारहाण केली नसती, तर माझ्यावर गुन्हा दाखल नसता.

तुझ्यामुळे मी विनाकारण यात गुंतलो असून, माझा पैसा व वेळ वाया जात आहे.’ असे म्हटल्यावरून शुक्रवारी (ता. २५) रात्री साडेआठच्या दरम्यान दोघांत भांडण होऊन लहान भाऊ विश्वास याला राग येऊन त्याने राहत्या घरी नरेश याच्या डोक्यावर कुऱ्हाडीने सपासप वार करून खून केला.

हेही वाचा : Credit Card फसवणूक....काय घ्याल काळजी?

घटनेची माहिती मिळताच नंदुरबार उपविभागीय पोलिस अधिकारी संजय महाजन, विसरवाडी पोलिस ठाणे सहाय्यक निरीक्षक प्रकाश वानखडे, अमलदार यांनी वागदी गावात घटनास्थळी धाव घेऊन पंचनामा केला व मृतदेह विच्छेदनासाठी विसरवाडी ग्रामीण रुग्णालयात पाठविला.

सरिता नरेश गावित यांच्या फिर्यादीवरून संशयित विश्वास गावित याच्याविरुद्ध गुन्हा दाखल झाला. घटनेनंतर संशयित विश्वास फरारी आहे. पुढील तपास सहाय्यक पोलिस निरीक्षक प्रकाश वानखेडे करीत आहे.