नाशिक : (इगतपुरी) खतांचा वापर व अत्याधुनिक मशिनरीमुळे धानाची तसेच, तांदळाची जीवनसत्त्वे कमी होत आहेत. आरोग्याची होणारी हानी लक्षात घेता घोटी येथील अन्नपूर्णा स्वयंसहाय्यता महिला बचतगटाने हातसडीचा तांदूळ, जात्यावरच्या डाळी बचतगटाच्या माध्यमातून विक्रीसाठी उपलब्ध केल्या आहेत. महाराष्ट्र राज्य ग्रामीण जीवनशैली अभियानांतर्गत मुंबई येथे महालक्ष्मी सारस प्रदर्शनात या मालाचा चांगला प्रतिसाद मिळत आहे.

विश्‍वासू बचतगटांनाच या ठिकाणी संधी

प्रदर्शनात राज्यातील निवडक बचतगटांचा सहभाग असतो. इगतपुरी तालुक्‍यातील या एकाच अन्नपूर्णा स्वयंसहाय्यता बचतगटाची निवड झाली असल्याची माहिती गटाच्या अध्यक्षा मथुरा जाधव यांनी दिली. महाराष्ट्र राज्य ग्रामीण जीवनशैलींतर्गत प्रत्येक वर्षी भव्य प्रदर्शन होते. त्याअंतर्गत राज्यभरातील निवडक बचतगटांचीच निवड करण्यात येते. विशेष म्हणजे विश्‍वासू बचतगटांनाच या ठिकाणी संधी दिली जाते. घोटी येथील अन्नपूर्णा स्वयंसहाय्यता महिला बचतगटाचे सामाजिक कार्य व उत्पादनाची विश्‍वासार्हता लक्षात घेता या राज्यस्तरीय प्रदर्शनात या गटाची निवड करण्यात आली. 

अनेक बचतगटांची निर्मिती

मथुरा जाधव यांनी गेल्या 13 वर्षांत तालुक्‍यातील ग्रामीण भागात जाऊन बचतगटनिर्मितीसाठी विशेष मार्गदर्शन करत अनेक बचतगटांची निर्मिती केली आहे. 
त्यांनी बचतगटाचे फायदेदेखील सांगितले आहेत. दरम्यान, बचतगटाला जिल्हा समन्वयक संतोष डोंबे, सुशील चौधरी, संदीप सोनवणे यांचेदेखील सहकार्य लाभले आहे. 

हेही वाचा > "पप्पा तुम्ही लवकर परत या!" चिमुकल्याची आर्त हाक...काळजाला फोडला पाझर

मोठ्या प्रमाणात बचतगटाच्या माध्यमातून हातसडीचा तांदूळ विक्री

तेरा वर्षांत मी इगतपुरी तालुक्‍यात बचतगटाच्या माध्यमातून अनेक सामाजिक उपक्रम राबवीत आहे. आम्ही शुद्ध गुळाचे उत्पादनदेखील मोठ्या प्रमाणात करत असतो. विशेष म्हणजे हातसडीचा तांदूळ मोठ्या प्रमाणात बचतगटाच्या माध्यमातून विक्री करत असतो. -मथुरा जाधव, अध्यक्षा, अन्नपूर्णा महिला स्वयंसहाय्यता महिला बचतगट 

हेही वाचा >PHOTOS : डॉक्टरांनो.. प्रिस्क्रिप्शन राष्ट्रभाषेत लिहिण्याचा प्रयत्न करा - राज्यपाल