Dhule Crime News : मध्य प्रदेशातून पिस्तूल खरेदी करून परतणाऱ्या जालना जिल्ह्यातील दोघांना सांगवी पोलिसांनी शिताफीने अटक केली. ११ मेस केलेल्या कारवाईत पाच गावठी पिस्तुले, ११ जिवंत काडतुसे आणि पल्सर दुचाकी असा एकूण तीन लाख दोन हजार रुपये किमतीचा मुद्देमाल जप्त करण्यात आला. जिल्हा पोलिस अधीक्षक श्रीकांत धिवरे यांनी रविवारी (ता. १२) सांगवी पोलिस ठाण्यात भेट देऊन या कारवाईबद्दल निरीक्षक श्रीराम पवार आणि सहकाऱ्यांचे कौतुक केले. ( Two arrested from Japan with 5 pistols and 11 cartridges )

डीवायएसपी भागवत सोनवणे उपस्थित होते. श्री. धिवरे यांनी गुन्ह्याची माहिती देताना सांगितले, की मध्य प्रदेशातील अवैध शस्त्रनिर्मितीसाठी कुख्यात असलेल्या उमरठी येथून गावठी पिस्तुले घेऊन संशयित महाराष्ट्रात येणार असल्याची माहिती निरीक्षक श्रीराम पवार यांना मिळाली होती. त्यांच्या आदेशावरून खामखेडा फाट्याजवळ सांगवी पोलिसांच्या पथकाने सापळा रचला. काही वेळाने दुचाकी (एमएच २०, एफई ५३६३)वर येणाऱ्या दोघांना पोलिसांनी थांबण्याचा इशारा केला.

मात्र संशयितांनी दुचाकीचा वेग वाढवून शिरपूरच्या दिशेने पलायन केले. खामखेडा गावाजवळ रस्त्याच्या बाजूला दुचाकी सोडून देत संशयित बाजरीच्या शेतात शिरले. पोलिसांनी शेतात शोध घेऊन दोघांना अटक केली. त्यांची झडती घेतली असता दीड लाख रुपये किमतीचे पाच गावठी कट्टे, २२ हजार रुपये किमतीची नऊ एमएमची ११ जिवंत काडतुसे आणि एक लाख ३० हजार रुपये किमतीची बजाज पल्सर दुचाकी असा एकूण तीन लाख दोन हजार रुपये किमतीचा मुद्देमाल जप्त करण्यात आला.

संशयितांमध्ये बाबासाहेब रामभाऊ मिसाळ (वय २८, रा. जानेफळ, ता. भोकरदन, जि. जालना, ह.मु. छत्रपती संभाजीनगर) व परमेश्वर भाऊसाहेब मिसाळ (२६, रा. देवळीगव्हाण, ता. जाफराबाद, जि. जालना) यांचा समावेश आहे. त्यांच्याविरोधात सांगवी पोलिस ठाण्यात गुन्हा दाखल करण्यात आला.

पोलिस अधीक्षक श्रीकांत धिवरे, अपर अधीक्षक किशोर काळे, डीवायएसपी भागवत सोनवणे यांच्या मार्गदर्शनाखाली निरीक्षक श्रीराम पवार, उपनिरीक्षक कृष्णा पाटील, बाळासाहेब वाघ, सहाय्यक उपनिरीक्षक रफिक मुल्ला, हवालदार संदीप ठाकरे, भूषण पाटील, संजय भोई, स्वप्नील बांगर, योगेश मोरे, कृष्णा पावरा, अल्ताफ मिर्झा, मनोज पाटील यांनी ही कारवाई केली.