Dhule Crime News : बुडकीविहीर (ता. शिरपूर) येथील गांजाच्या शेतात कारवाई करून सांगवी पोलिसांनी साडेनऊ क्विंटल ओला गांजा जप्त केला. बुधवारी (ता. ११) दुपारी ही कारवाई करण्यात आली.

जप्त गांजाची एकूण किंमत ३३ लाख ५५ हजार रुपये आहे.( ganja seized from farm dhule crime news )

गांजाची लागवड करणारा शेतमालक फरारी झाला असून, त्याच्याविरोधात गुन्हा दाखल करण्यात आला. बुडकीविहीर येथे शेतात गांजाची झाडे लावल्याची माहिती सहाय्यक निरीक्षक जयेश खलाणे यांना मिळाली होती. त्यांनी सहकाऱ्यांसह बुधवारी दुपारी शेत गाठले.

शेतमालक जागेवर नसल्यामुळे तेथील पोलिसपाटील सुनील पावरा यांना बोलावून चौकशी केली असता गांजाची लागवड केलेले शेत विठ्ठल बारक्या पावरा (रा. बुडकीविहीर) याच्या मालकीचे असल्याची माहिती मिळाली.

शेतात पाच ते सहा फूट वाढलेली गांजाची झाडे आढळली. पोलिसांनी झाडे उपटून जप्त केली. त्यांचे वजन ९३० किलो भरले. या मुद्देमालाची किंमत ३३ लाख ५५ हजार रुपये आहे. हवालदार सुनील पवार यांनी दिलेल्या फिर्यादीवरून संशयित विठ्ठल पावरा याच्याविरोधात सांगवी पोलिस ठाण्यात गुन्हा दाखल करण्यात आला.

संशयित फरारी असून, त्याच्या शोधासाठी पथक रवाना करण्यात आले. पोलिस अधीक्षक संजय बारकुंड, अपर अधीक्षक किशोर काळे, पोलिस उपअधीक्षक सचिन हिरे यांच्या मार्गदर्शनाखाली सहाय्यक निरीक्षक जयेश खलाणे, उपनिरीक्षक संदीप पाटील, कृष्णा पाटील, मंगला पवार, हवालदार चत्तरसिंग खसावद, आरिफ पठाण, शेखर बागूल, रोहिदास पावरा, राजेश्वर कुवर, जयेश मोरे, योगेश मोरे, शिवाजी वसावे, कृष्णा पावरा, अल्ताफ मिर्झा, मनोज पाटील यांनी ही कामगिरी बजावली.