Dhule Crime News : जिल्हा न्यायालयाने कलमाडी (ता. शिंदखेडा) येथील मुरलीधर धोंडू पाटील खूनप्रकरणी पुतण्या सूर्यकांत अभिमन पाटील यास जन्मठेपेची शिक्षा ठोठावली.

कलमाडी शिवारात २३ जुलै २०१५ ला सकाळी साडेआठच्या सुमारास विहिरीत पाण्याची मोटार का बसविली, या कारणावरून वाद झाला. (Life imprisonment for nephew in murder case dhule crime news)

यात दीपचंद महारू पाटील यांच्या शेताजवळ मुरलीधर पाटील पायी शेतात जात असताना मागून त्यांना आरोपी सूर्यकांत पाटील (रा. कलमाडी) याने त्याच्या मोटारसायकलीने धडक दिली. तसेच चाकूने मुरलीधर पाटील यांच्या पोटात वार करत गंभीर दुखापत केली.

नंतर धुळे शहरातील खासगी रुग्णालयात उपचार घेत असताना २९ जुलै २०१५ ला मुरलीधर पाटील यांचा मृत्यू झाला. त्यानुसार नरडाणा पोलिस ठाण्यात खुनाचा गुन्हा दाखल झाला.

दोषारोपपत्र दाखल झाल्यावर जिल्हा व सत्र न्यायाधीश एम. जे. जे. बेग यांच्यापुढे कामकाज चालले. सरकार पक्षातर्फे अकरा साक्षीदारांची अतिरिक्त सरकारी अभियोक्ता ॲड. गणेश वाय. पाटील यांनी साक्ष घेतली.

डॉ. मिलिंद पाटील, डॉ. आर. के. गढरी, प्रत्यक्षदर्शी साक्षीदार फिर्यादी, आरोपीचे काका देवमन व्यंकट पाटील, पोलिस तपास अधिकारी बी. एम. काळे यांचीही साक्ष व ॲड. पाटील यांचा युक्तिवाद ग्राह्य धरण्यात आला.

विविध पुराव्यांमुळे न्यायालयाने आरोपी सूर्यकांत पाटील याला जन्मठेपेची शिक्षा ठोठावली. तसेच दहा हजारांचा दंड व तो न भरल्यास दोन वर्षे सक्तमजुरीच्या शिक्षेचाही आदेश न्या. बेग यांनी दिला.