धुळे : जिल्ह्यात गेल्या तीन आठवड्यांपासून कोरोनाचा (corona) संसर्ग नियंत्रणात आला आहे. सद्यःस्थितीत तपासणी चाचणीअंती (corona test) बाधित आढळणाऱ्या अहवालांची संख्या शून्य येत आहे. त्यामुळे जिल्हा प्रशासनासह व्यावसायिक आणि नागरिकांना आश्वासक दिलासा मिळत आहे. परंतु, असे असतानाच शेजारील नगर जिल्ह्यात कोरोना रुग्णांची संख्या (corona patient) पाच दिवसांत वाढीस लागली आहे. पुण्याहून नगरमार्गे धुळे जिल्ह्यात येणाऱ्यांची संख्या अधिक आहे. त्यामुळे येथील दिलासादायक वातावरणाला काळजीची किनार लागली आहे.

(corona situation in ahmednagar threatens dhule district)

दरम्यान, जिल्ह्यात शुक्रवारी एकही कोरोनाबाधित रुग्ण आढळला नाही. तसेच ॲक्टिव्ह पाच रुग्ण उपचार घेत आहेत. जिल्ह्यात दीड वर्षांपासून कोरोनाचा संसर्ग वाढीस लागला होता. दुसऱ्या लाटेत केवळ वयोवृद्ध नव्हे, तर काही तरुणांचाही बळी गेला. अनेक उपाययोजना केल्यानंतर शहरासह जिल्ह्यात कोरोना नियंत्रणात येऊ लागला. जिल्ह्यातील सुमारे ५० टक्क्यांपेक्षा अधिक नागरिकांना कोरोना प्रतिबंधात्मक लसीकरण केले. अनेकांनी लसीकरणाचे दोन डोस घेतले आहेत.

सद्या समाधानकर स्थिती

वैयक्तिक आणि सार्वजनिक आरोग्यहित राखणे, वेळोवेळी हात धुणे, मास्क वापरणे या त्रिसूत्रीचा अवलंब केला जात आहे. त्यामुळे स्थितीत सुधारणा होत आहे. असे असले तरी गर्दीच्या ठिकाणी जाणे टाळावे, गर्दी करू नये, मास्कचा सतत वापर करावा, असे आवाहन जिल्हा प्रशासनाने केले आहे. जिल्ह्यातील स्थिती समाधानकारक आहे.

पण काळजी वाढली..

तरी शेजारील नगर जिल्ह्याने मात्र काळजी वाढविली आहे. पुण्याहून धुळ्यात येणारे अनेक जण नगरमार्गे येतात. अशा नागरिकांमुळे जिल्ह्यात कोरोना संसर्ग वाढू नये, यासाठी जिल्हा व पोलिस प्रशासन, आरोग्य यंत्रणेने तत्काळ प्रभावी उपाययोजना कराव्या, अशी मागणी होत आहे. संभाव्य तिसऱ्या लाटेबाबत तयारी करणाऱ्या प्रशासनाने या स्थितीकडे दुर्लक्ष करू नये, अशी अपेक्षा व्यक्त होते.