नंदुरबार ः धडगाव येथे शेती अवजारे विक्रीच्या दुकानात अनधिकृतरीत्या घातक शस्त्र बाळगणाऱ्या दुकानदारास स्थानिक पोलिसांनी मुद्देमालासह ताब्यात घेतले. त्याच्याकडून एक लाख २८ हजार रुपये किमतीच्या २० तलवारी जप्त करण्यात आल्या आहेत.

नंदुरबार जिल्हा पोलिस अधीक्षक पी. आर. पाटील यांनी स्थानिक गुन्हे शाखेला अवैध शस्त्रांवर कारवाईचे आदेश दिले आहेत. त्या अनुषंगाने सोमवारी स्थानिक गुन्हे शाखेचे पोलिस निरीक्षक रवींद्र कळमकर यांना धडगावात मुख्य रस्त्यावर शेती अवजारे विक्रीच्या दुकानात लोखंडी बनावटीच्या तलवारी बेकायदेशीररीत्या कब्जात बाळगून आहे, अशी बातमी मिळाली होती.

पाळत ठेवून एकाला अटक

त्यानुसार पोलिस निरीक्षक कळमकर यांनी स्थानिक गुन्हे शाखेचे एक पथक तयार करून तत्काळ धडगाव पाठविले. पथकाने तेथे खात्री केली असता धडगाव येथील मुख्य रस्त्यावरील पत्र्याच्या टपरीबाहेर संशयास्पद हालचाली करताना एक जण दिसून आला. पथकाने संजय कागडा वळवी (वय ३८, रा. कात्री, ता. धडगाव) यास ताब्यात घेत. टपरीची झडती घेतली असता तेथे एक लाख २८ हजार रुपये किमतीच्या २० लहान-मोठ्या धारदार तलवारी मिळून आल्याने संजय कागडा याच्याविरुद्ध धडगाव पोलिस ठाण्यात गुन्हा दाखल करण्यात आला. ही कारवाई अपर पोलिस अधीक्षक विजय पवार, स्थानिक गुन्हे शाखेचे पोलिस निरीक्षक रवींद्र कळमकर, सहाय्यक पोलिस निरीक्षक संदीप पाटील, हवालदार विनोद जाधव, पोलिस नाईक जितेंद्र अहिरराव, पोलिस अंमलदार अभिमन्यू गावित, दीपक न्हावी, रमेश साळुंके यांनी केली आहे.

या कारवाईमुळे अवैध शस्त्र बाळगणाऱ्या गुन्हेगारांच्या मनात भितीचे वातावरण निर्माण झालेले असून भविष्यात कोणी अवैध शस्त्र जवळ बाळगल्यास त्यांची गय केली जाणार नाही
-पी. आर. पाटील, जिल्हा पोलिस अधीक्षक, नंदुरबार