शहादा: शहाद्यात एकाच दिवशी पाच रूग्णांचा कोरोना पॉझिटीव्ह अहवाल आला. त्यात एका कोरोनाग्रस्त डॉक्टरच्या कुटुंबातील चौघांचा समावेश असल्याने नागरिक हादरले आहेत. नऊ कोरोनाग्रस्त रुग्णांपैकी एकासह शहरातील काही डॉक्टर एका नोंदणी नसलेल्या खेतिया रस्त्यावरील क्रिटीकल केअर सेंटरमध्ये वैद्यकीय सेवा देत असल्याची धक्कादायक बाब समोर आल्याने तर शहरवासियांची पाचावर धारणच बसली आहे. 

नक्की वाचा : संचारबंदीचे नियम कडक करावेत : अतिरिक्त आयकर आयुक्त साळुंखे 
 

शासनाची परवानगी नसताना गत तीन महिन्यांपासून हे सेंटर शहरात सुरू असताना त्याकडे सहेतूक दुर्लक्ष केल्याने याची सर्वांगीण चौकशी होणे तेवढेच गरजेचे आहे. गत महिनाभराच्या कालावधीत या सेंटरमध्ये किती नागरिकांनी उपचार घेतले याची तपासणी करणे आवश्यक आहे. 

संसर्ग होतो तरी कसा? 
जिल्ह्यात सर्वाधिक नऊ कोरोनाबाधित शहाद्यात आढळून आले असून एकाच मृत्यू झाला आहे. दुर्दैवाने त्याच्या अतिनिकट संपर्कात आलेल्या चौघांचे अहवाल पॉझिटिव्ह आले. त्यानंतर तपासणी वाढत गेली तशी कोरोनाग्रस्तांची संख्या दिवसागणिक वाढत आहे. कुठलीही ट्रॅव्हल हिस्ट्री नसताना दोन, दोनाचे चार, चाराचे नऊ रूग्ण शहादेकरांना वेदना देणारे ठरत आहे. कोरोनाचा संसर्ग कसा होतोय याची सखोल चौकशी करावी अशी अपेक्षा शहरवासीय करीत आहेत. दुर्दैवाने शहर कोरोना बाधीतांचे हॉटस्पॉट ठरत आहे. 

 नक्की वाचा  त्या' कोरोनाबाधिताने दिला खोटा पत्ता 
 

ट्रॅव्हल हिस्ट्री पुन्हा तपासा 
३२ वर्षीय व्यापाऱ्याचे निधन झाल्यानंतर त्याच्या अति निकट संपर्कात आलेल्या चौघांचे अहवाल पॉझिटिव्ह आले. प्रशासनाने मृत व्यापाऱ्याची ट्रॅव्हल हिस्ट्री व इतर हिस्ट्री गांभीर्याने तपासण्याची पुन्हा गरज आहे. प्रशासनाने बाधित रुग्णांच्या संपर्कातील नागरिकांचा शोध घेणे सुरू केले असून यातूनच या तीन दिवसात एका डॉक्टरसह त्याच्या कुटुंबातील अन्य अशा पाच जणाचा पॉझिटीव्ह अहवाल आला. 

त्यांची पुन्हा तपासणी गरजेची 
प्रभाग ७ वरून ही व्याप्ती प्रभाग २ व ४ पर्यंत पोहचली. मृताची ट्रॅव्हल हिस्ट्री वगळता त्याच्या संपर्कात असलेले बाहेरगावी प्रवासाला देखील गेलेले नव्हते अशी माहिती पुढे येत आहे. मग कोरोनाचा संसर्ग यांना कसा झाला हे कोडे आहे. कारण मृताच्या कुटुंबियातील सदस्यांसह इतर संपर्कात आलेल्या नागरिकांचे अहवाल मोठ्या प्रमाणात निगेटिव्ह आले असल्याने त्यांची पुन्हा तपासणी होणे गरजेचे आहे. 

क्‍लिक कराः विशेष पोलिस अधिकाऱ्यांच्या "कोरोना'च्या पार्श्‍वभूमीवर नियुक्‍त्या 
 

ते रूग्णालय सुरू कसे? 
जे तीन रुग्ण बाधित आहे, यांच्यासह शहरातील इतर काही डॉक्टर एका नोंदणी नसलेल्या खेतिया रस्त्यावरील क्रिटीकल केअर सेंटरमध्ये गेल्या तीन महिन्यापासून वैद्यकीय सेवा देत आहेत. मुळात शासनाची कुठलीही परवानगी नसताना गेले तीन महिन्यांपासून बिगर नोंदणीकृत क्रिटीकेअर सेंटर कसे काय सुरू होते याचीही चौकशी या अनुषंगाने होणे गरजेचे आहे. यासोबतच महिनाभराच्या कालावधीत या सेंटरमध्ये किती नागरिकांनी उपचार घेतले याची तपासणी करणे आवश्यक ठरत आहे. शहरातील मुख्य रस्त्यावर अद्याप परवानगी मिळाली नसताना क्रिटीकेअर सेंटर बिनदिक्कत सुरू होते. याला कोणाचा वरदहस्त होता, प्रशासनातील या शुक्राचार्यांवर कारवाई आवश्यक आहे.