नंदुरबारमध्ये गरोदर महिलांना घेऊन जाणाऱ्या एका रुग्णवाहिकेला भीषण अपघात झाला आहे. तब्बल 13 गरोदर महिला रुग्णवाहिकेत होत्या. गरोदर महिलांना घेऊन जाणाऱ्या रुग्णवाहिकेचा भीषण अपघात झाला. मात्र, मोठा अनर्थ टळला आहे. 13 गरोदर महिला थोडक्यात बचावल्या.

नंदुरबार जिल्ह्यातील शहादा लोणखेडा कॉलेज गेटसमोर ही ऍम्ब्युलन्स पलटी झाली आहे. गरोदर महिलांना सोनोग्राफी करण्यासाठी घेऊन जाणाऱ्या रुग्णवाहिकेचा अपघात झाला. सुदैवाने या अपघातामध्ये कुठलीही जीवित हानी झाली नाही. या अपघातात 14 जण जखमी झाले असून, यामध्ये 13 गरोदर मातांचा समावेश आहे.

अपघातामध्ये जखमी झालेल्यांना शहादामधल्या उपजिल्हा रुग्णालयात उपचारासाठी नेण्यात आलं आहे. अतिदुर्गम भाग असलेल्या तेलखेडी प्राथमिक आरोग्य केंद्रातले हे रुग्ण होते. ऍम्ब्युलन्स पलटी झाल्यानंतर तिकडे उपस्थित असलेल्या नागरिकांनी ऍम्ब्युलन्समधून रुग्ण आणि गरोदर मातांना बाहेर काढलं. या ऍम्ब्युलन्सचा अपघात ड्रायव्हरचा ताबा सुटल्यामुळे झाला का अतिवेगामुळे झाला या घटनेचा अधिक तपास सुरू आहे.

या अपघाताची शहादा पोलीस ठाण्यामध्ये नोंद करण्यात आली असून, पोलीस या अपघात प्रकरणी अधिक तपास करत आहेत. या अपघातामध्ये नेमकी चूक कोणाची? याचाही शोध पोलीस घेत आहेत. मात्र, सुदैवाने या अपघातामध्ये 13 गरोदर मातांपैकी कोणाच्याही जिवाला धोका पोहोचला नाही.