Nandurbar News : राजकीय नेते म्हणून एरवी एखाद्या गावाला भेट देणे आणि निवडणूक डोळ्यासमोर ठेवत गाव भेटीतून थेट नागरिकांशी संवाद साधणे यात मोठा फरक आहे. त्यामुळे निवडणुकीची अधिसूचना १८ एप्रिलपासून काढण्यात येणार असली तरी भाजपच्या उमेदवाराचे नाव सर्वप्रथम पक्षाने जाहिर केल्याने डॉ. हिना गावित यांनी गावभेटी, लग्न समारंभ. (Nandurbar Lok Sabha Constituency)

विविध सामाजिक कार्यक्रम व उपक्रमातून नागरिकांशी संवाद साधण्यात आघाडी घेतली आहे. तसेच कॉंग्रेसचे उमेदवार गोवाल पाडवीही मागे नाहीत. त्यांनीही पहिला टप्पा पूर्ण केला आहे. निवडणुकीचे वारे वाहू लागले की, मतदारसंघातील विकास कामांसोबतच जनतेच्या प्रश्‍नांचे विचार लोकप्रतिनिधी करू लागतात.

त्यामुळे निवडणूक फॅड तयार केले जाते. भाजपच्या उमेदवार डॉ. हिना गावित यांना तिसऱ्यांदा उमेदवारी करायचे निश्‍चित होते. त्यामुळे त्यांनी गेल्या वर्षभरापासूनच विविध योजनांची अंमलबजावणी सोबत त्यांचे उद्घाटन, शुभारंभच्या माध्यमातून आपले वर्चस्व मतदार संघावर कायम ठेवण्यात आघाडीवर राहिल्या.

तसेच मतदारसंघातील मिळालेल्या विवाह सोहळा,धार्मिक, सामाजिक कार्यक्रमांचे निमंत्रण स्विकारत तेथे उपस्थिती देत राहिल्या. त्यांना जमसंपर्कासाठी वेळ मिळाला. आताही त्या सुरूवातीपासूनच कामाला लागल्या आहेत. त्यांनी गावभेटीतून जनतेशी संवादाचा टप्पा पूर्ण केला. त्या आता गावपातळीवरील पदाधिकारी, कार्यकर्ते यांच्याशी निवडणुकीचे सुक्ष्म नियोजन करतांना दिसत आहेत. (Latest Marathi News)

तसेच कॉंग्रेसचे उमेदवार गोवाल पाडवी यांचे नाव ऐनवेळेस आले असले तरी लोकसभेची निवडणूक लढवायची हे माजी मंत्री ॲड. के.सी.पाडवी यांनी निश्‍चित केले होते. त्यामुळे ॲड. पाडवी यांनीही शक्य तेवढ्या गावांमध्ये संपर्क वाढवला होता. त्यातून त्यांनी निवडणुकीची मार्केटींग करण्यास सुरूवात केली होती.

त्याचा फायदा त्यांचे पुत्र गोवाल पाडवी यांना होत असल्याचे चित्र आहे. डॉ.हिना गावित व ॲड. गोवाल पाडवी हे गाव भेटीवर लक्ष केंद्रीत करीत आपआपल्या निवडणुकीचे नियोजन करतांना दिसत आहेत. तसेच काही अपक्ष उमेदवारही आपल्या परिने गाव -परिसरात आपण उमेदवारी करणार असल्याचे डंका वाजवतांना दिसत आहेत.