नाशिक : मुख्यमंत्री एकनाथ शिंदे यांनी स्वतंत्र सवतासुभा उभा केल्यानंतर शिवसेनेत मोठे फूट पडल्याचे राजकीय पातळीवर दिसत असले तरी संघटना मात्र उद्धव ठाकरे यांच्या पाठीशी उभी असल्याचे दिसून येत आहे.

विशेष म्हणजे नाशिकमधून ११००० प्रतिज्ञापत्र सादर करण्याचे आवाहन करण्यात आले होते. त्याला उत्तम प्रतिसाद मिळत सोमवारी (ता. ८) ९६७६ शपथपत्रांचा गठ्ठा पक्षप्रमुख उद्धव ठाकरे यांच्याकडे सादर करण्यात आला.

संपूर्ण शहरात सिडको विभागात सर्वाधिक पाच हजार १०० प्रतिज्ञापत्र दाखल झाले. पुढील काही दिवसात १३०० प्रतिज्ञापत्र भरून अकरा हजाराचा आकडा पूर्ण केला जाणार असल्याची माहिती महानगरप्रमुख सुधाकर बडगुजर यांनी दिली. (10000 affidavit from Shiv Sena to Uddhav Thackeray nashik Maharashtra Political News)

जून महिन्यात राज्यसभा व विधान परिषदेची निवडणूक आटोपल्यानंतर राज्याच्या राजकारणात भूकंप झाला. तत्कालीन नगरविकास मंत्री एकनाथ शिंदे यांच्या ४० आमदार सुरत मार्गे गुवाहाटी येथे पोचून शिवसेनेत उभी फूट पडली. त्यानंतर भाजपच्या पाठिंब्यावरर एकनाथ शिंदे यांची मुख्यमंत्रिपदी घोषणा करण्यात आली.

शिंदे गटाची भूमिका सरकार स्थापनेपर्यंतच होती असे नाही तर संघटनेवरदेखील त्यांनी दावा केला. शिवसेनेच्या प्रतोदकडून बजावण्यात आलेले व्हीप धुडकावण्यात आले. थेट न्यायालयात आवाहन देताना शिवसेनेच्या धनुष्यबाण चिन्हावरदेखील शिंदे गटाकडून दावा करण्यात आला. या पार्श्वभूमीवर उद्धव ठाकरे यांच्यासह आदित्य ठाकरे महाराष्ट्राच्या मैदानात उतरले.

त्यानंतर शिवसेनेची एकनिष्ठता सिद्ध करण्यासाठी शपथपत्र भरून घेण्याची मोहीम सुरू करण्यात आली. शहरातून ११ हजार शपथपत्र भरून देण्याचे निश्चित करण्यात आले. ९६४७ शपथपत्रांचा गठ्ठा मातोश्रीवर पक्षप्रमुख उद्धव ठाकरे यांच्याकडे सादर करण्यात आला. या वेळी शिवसेनेचे जिल्हाप्रमुख विजय करंजकर, महानगरप्रमुख सुधाकर बडगुजर, माजी विरोधी पक्षनेते अजय बोरस्ते, माजी गटनेते विलास शिंदे, उपनेते बबन घोलप, ज्येष्ठ नेते दत्ता गायकवाड आदी उपस्थित होते.

नोंदणीकडे लक्ष्य केंद्रित

सिडको व सातपूर अर्थात पश्चिम विधानसभा मतदारसंघातून सर्वाधिक पाच हजार १०० शपथपत्रे भरून देण्यात आली. मध्य विधानसभा मतदारसंघातून बाराशे, तर पंचवटी व नाशिक रोड अर्थात पूर्व विधानसभा मतदारसंघातून ३४०० प्रतिज्ञापत्र भरून देण्यात आली. उर्वरित तेराशे प्रतिज्ञापत्र लवकरच भरून दिली जाणार आहे. दरम्यान, शिवसेनेने आता सभासद नोंदणीकडेदेखील लक्ष केंद्रित केले असून, जिल्ह्यातून एक लाख सदस्य नोंदणीचे लक्ष ठेवण्यात आले आहे.