Nashik News : राज्यातील सहाय्यक वनसंरक्षकांना पदोन्नती मिळाल्याने नाशिक जिल्ह्यातील १२ जागा सध्या रिक्त आहेत. उर्वरित नऊ वनसंरक्षकांकडे अतिरिक्त कार्यभार सोपवण्यात आल्याने नांदूरमध्यमेश्वर, कळसूबाई, हरिश्चंद्रगडसारख्या ठिकाणी पर्यटकांची सुरक्षेचा प्रश्न निर्माण होऊ शकतो.

पश्चिम नाशिक वन विभागाच्या सहायक वनसंरक्षक अश्विनी खोपडे व पूर्वचे सहायक वनसंरक्षक संजय मोरे यांचा पदभार अनिल पवार यांच्याकडे देण्यात आला आहे. (12 Vacancies of Assistant Conservator of Forests nashik news)

पूर्व वन विभागाच्या वनीकरण व वन्यजीव संरक्षण पदाचा अतिरिक्त कार्यभार सुजित नेवसे यांच्याऐवजी मूल्यांकनाचे सहायक वनसंरक्षक जितेंद्र कोहाळे यांना देण्यात आला आहे.

नाशिक वनवृत्ताचे सहायक वनसंरक्षक पदाचा कार्यभार सहायक वनसंरक्षक शेखर तनपुरे यांच्याकडे सोपविण्यात आला आहे. नाशिक वन्यजीव विभागातील कळसूबाई, हरिश्चंद्रगड अभयारण्याचे सहाय्यक वनसंरक्षक गणेश रणदिवे यांचा अतिरिक्त कार्यभार राजूर वनपरिक्षेत्र अधिकारी दत्तात्रेय पडवळे यांच्याकडे तसेच नांदूरमध्यमेश्वर अभयारण्याच्या तृप्ती निखाते यांचा पदभार वनपरिक्षेत्र अधिकारी शेखर देवकर यांच्याकडे सोपविण्यात आला आहे. अतिरिक्त विभागीय वनाधिकारी (योजना) ची जबाबदारी दक्षताचे विभागीय अधिकारी विशाल माळी यांच्याकडे सोपविण्यात आली आहे.

हेही वाचा : Credit Card फसवणूक....काय घ्याल काळजी?

अहमदनगरमध्येही तीच परिस्थिती

अहमदनगर वनीकरण वन्यजीव पदाचा पदभार संगमनेरचे सहाय्यक वनसंरक्षक संदीप पाटील यांच्याकडे, तर अहमदनगर अतिरिक्त रोहयो-कॅम्पचा कार्यभार वनपरिक्षेत्र अधिकारी सुरेश राठोड यांच्याकडे सोपवला आहे. रिक्त जागा केव्हा भरण्यात येणार, याकडे सर्वांचे लक्ष लागून आहे.

रिक्त जागा

पूर्व विभाग- ४ (३ प्रादेशिक व १ सामाजिक वनीकरण)

पश्चिम विभाग- २ (प्रादेशिक)

नगर विभाग- ३ (२ प्रादेशिक व १ सामाजिक वनीकरण)

वन्यजीव विभाग- २

मुख्य वनसंरक्षक कार्यालय- १