सटाणा (जि. नाशिक) : लाखो भाविकांचे श्रद्धास्थान असलेल्या येथील संत शिरोमणी देवमामलेदार श्री यशवंतराव महाराज यांच्या १३४ व्या पुण्यतिथीनिमित्त शहरात सलग १५ दिवस चालणारा यात्रोत्सव आणि ऐतिहासिक रथ मिरवणूक यंदा १३४ वर्षांत प्रथमच कोरोना संसर्गाच्या पार्श्वभूमीवर रद्द करण्यात आल्याचे प्रशासन आणि देवस्थान ट्रस्टने जाहीर केले.

व्यावसायिकांचे मोठे नुकसान 

येत्या मार्गशीर्ष वद्य एकादशी म्हणजेच ९ जानेवारीला प्रमुख मानकऱ्यांच्या हस्ते देवमामलेदारांचा विधिवत अभिषेक व महापूजा करून सांगता समारंभ होणार आहे. दरम्यान, यात्रोत्सव रद्द झाल्याने शहरातील लाखोंची उलाढाल थांबणार असून, व्यावसायिकांचे मोठे नुकसान होणार आहे. परंपरेनुसार बागलाणचे तहसीलदार, नगराध्यक्ष व देवस्थान अध्यक्ष यांच्या हस्ते मार्गशीर्ष वद्य एकादशी (ता.९)ला देवमामलेदारांची पहाटे महापूजा व अभिषेक होणार आहे. यात्रोत्सवानिमित्त शहरवासीयांचे प्रमुख आकर्षण असलेली रथ मिरवणूकही यंदा रद्द करण्यात आल्याने सर्वत्र निरुत्साह आहे. मात्र या कालावधीत भाविकांना दर्शनासाठी मंदिर खुले राहणार असल्याचे देवस्थानने स्पष्ट केले आहे. 

हेही वाचा - जेव्हा पोटच्या गोळ्यांसह मातेचे मृतदेह दिसले पाण्यावर तरंगताना; शेतकऱ्यांना भरला थरकाप

कोरोना संसर्गामुळे यंदाचा देवमामलेदार श्री यशवंतराव महाराजांचा यात्रोत्सव आणि रथ मिरवणूक रद्द करण्याचा निर्णय घेण्यात आला असून, शासकीय नियम व आदेशानुसार अभिषेक महापूजा होणार आहे. भाविकांसाठी मंदिर खुले ठेवण्यात येणार आहे. 
-भालचंद्र बागड, देवस्थान ट्रस्ट अध्यक्ष, सटाणा 

हेही वाचा - सावधान! आतापर्यंत पक्ष्यांच्या जिवावर बेतणारे प्रकार आता माणसांवरही; महिलेचा बळी