नाशिक : नाशिक रोड रेल्वेस्थानकाचे अत्याधुनिकीकरण होणार असून, महारेलतर्फे स्थानकाचे रूप पूर्णपणे पालटले जाणार आहे. या रेल्वेस्थानकाला कॉर्पोरेट लूक मिळणार आहे. येत्या काही महिन्यांत त्याला आंतरराष्ट्रीय दर्जाची झळाळी प्राप्त होणार आहे. (Multi Hub at Nashik Road Railway Station)

महारेल, मेट्रो, रेल्वे आणि नाशिक महापालिका यांच्यातर्फे नाशिक रोड रेल्वेस्थानकावर सुमारे ५० मजले उंचीचे मल्टिमॉडेल हब उभारण्यात येणार असून, प्रवाशांना एकाच छताखाली सर्व प्रकारच्या सोयी-सुविधा उपलब्ध होणार आहेत. पहिल्या मजल्यावर हायस्पीड रेल्वेलाइन, तर दुसऱ्या मजल्यावर मेट्रो निओ असणार आहे. मल्टिमॉडेल हबचे काम लवकरात लवकर व्हावे, यासाठी महारेलने इच्छुक कंत्राटदारांकडून लेटर ऑफ इंटरेस्ट मागविण्याची प्रक्रिया सुरू केली आहे. खासदार हेमंत गोडसे यासाठी पाठपुरावा करीत आहेत. महामार्ग, मेट्रो आणि रेल्वेस्थानक, अशा सगळ्यांचे एक हब करण्यासाठी त्यांनी प्रयत्न चालविले होते.