नाशिक : राज्य सरकारी कर्मचाऱ्यांसाठी लागू असलेली अपघात विमा योजना महापालिका कर्मचाऱ्यांनाही लागू केली जाणार आहे. मार्च महिन्याच्या वेतनातून सदर योजनेची कपात करण्याच्या सूचना देण्यात आल्या आहेत. राज्य सरकारने त्यांच्या कर्मचाऱ्यांसाठी शासकीय कर्मचारी समूह वैयक्तिक अपघात विमा योजना लागू केली आहे. (Accident insurance plan applicable to NMC employees nashik news)

सदर योजनेची व्याप्ती वाढवताना भारतीय वनसेवा, भारतीय प्रशासकीय सेवेतील अधिकारी व शासकीय विभागांच्या प्रशासकीय नियंत्रणाखाली विविध घटकांना समाविष्ट करून घेण्यात आले आहे.

सातवा वेतन आयोग व महागाई निर्देशांक विचारात घेऊन १ एप्रिल २०२३ पासून विमा योजनेची वर्गणी व राशीभूत रकमेत वाढ करण्यात आली आहे. त्याच अनुषंगाने महापालिका आस्थापनेवरील अधिकारी व कर्मचाऱ्यांनादेखील अपघात विमा योजना लागू केली जाणार आहे.

हेही वाचा : 'पठाण'..आणि २०२३ मधले बाॅलीवूड..कसे असतील दिवस

मार्चच्या वेतनातून विमा वर्गणीची कपात करण्याच्या सूचना समाजकल्याण विभागामार्फत खातेप्रमुखांना देण्यात आली आहे. गट अ वर्गातील कर्मचाऱ्यांसाठी ८८५ रुपये वर्गणी असून, त्यांना २५ लाख रुपयांची राशीभूत रक्कम मिळेल.

गट ब साठी सातशे आठ रुपये वर्गणी असून, वीस लाख रुपये वार्षिक राशिभूत रक्कम आहे. गट क साठी ५३१ रुपये वर्गणी असून, १५ लाख रुपये वार्षिक राशिभूत रक्कम आहे, तर गट ड साठी ५३१ वर्गणी असून १५ लाख रुपये राशीभूत रक्कम आहे.