नाशिक : नायलॉन मांजामुळे महिलेचा बळी गेल्याने प्रशासकीय यंत्रणा पुन्हा एकदा सतर्क झाली आहे. पोलिस यंत्रणेने नव्या वर्षात नायलॉन मांजाविरोधात मोहीम राबविण्याचे नियोजन सुरू केले आहे. तर जिल्हाधिकाऱ्यांनी नायलॉन मांजावर बहिष्कार टाकण्याचे आवाहन केले आहे. 

नियम आहे, पण धाब्यावर 
पर्यावरण व पशूपक्ष्यांच्या रक्षणासाठी, तसेच सामान्य नागरिकांना नायलॉन मांजामुळे होणाऱ्या इजा व दुखापती टाळण्याच्या दृष्टीने नायलॉन मांजाचा वापर करण्यात येऊ नये म्हणून शासनामार्फत २०१६ मध्ये पर्यावरण संरक्षण कायदा १९८६ च्या कलम पाचप्रमाणे या नायलॉन मांजाच्या खरेदी-विक्री, साठवणूक व वापरावर निर्बंध घातले आहेत. प्रशासनाने १४४ नियमांतर्गत जिल्ह्यात नायलॉन मांजाच्या वापरावर प्रतिबंध आहे. मात्र दर वर्षी धोकादायक मांजामुळे पक्षी मरतात. यंदा महिलेचा मृत्यू झाला आहे. दर वर्षी मांजामुळे अपघातात अनेक मुले जखमी झाले आहेत. नियम असला तरी तो धाब्यावर बसविला जातो. असाच शहर जिल्ह्यातील अनुभव आहे. 

हेही वाचा - जेव्हा पोटच्या गोळ्यांसह मातेचे मृतदेह दिसले पाण्यावर तरंगताना; शेतकऱ्यांना भरला थरकाप

पोलिस लागले कामाला 
शहर पोलिसांनी महिलेच्या मृत्यू प्रकरणाची गंभीर दखल घेत धोकादायक मांजावर व्यापक कारवाईचे नियोजन सुरू केले आहे. नवीन वर्षात शहर पोलिसांच्या कारवाईचा बडगा उगारला जाईल. त्यासाठी प्रतिबंधात्मक आदेशाचे उशिरापर्यंत नियोजन सुरू होते. त्यामुळे दोन दिवसांत आदेश निघून साधारण ४ ते १४ जानेवारी, अशा दहा दिवसांत पोलिस कारवायांचा धडाका सुरू होण्याची शक्यता आहे. 

हेही वाचा - सावधान! आतापर्यंत पक्ष्यांच्या जिवावर बेतणारे प्रकार आता माणसांवरही; महिलेचा बळी

पतंगाच्या खेळाचा आनंद घेताना पक्षी व नागरिकांच्या जीविताची काळजी घेणेदेखील महत्त्वाचे असल्याने पतंगासाठी नायलॉन मांजाचा वापर करणे टाळून सुजाण नागरिक म्हणून सर्वांनी नायलॉन मांजावर बहिष्कार टाकावा. -सूरज मांढरे (जिल्हाधिकारी, नाशिक)