पंचवटी (जि. नाशिक) : म्हसरूळ पोलिस ठाणे हद्दीतील पेठ रोडवरील चामर लेणीकडे जाणाऱ्या मार्गावर असलेल्या शेतातील विहिरीत अज्ञात व्यक्तींचा मृतदेह (Dead body) आढळला आहे. याप्रकरणी अकस्मात मृत्यूची नोंद करण्यात आली आहे. (An unidentified body is found in well Incident in Mhasrul police station area nashik Latest Marathi News)

याबाबत अधिक माहिती अशी की, पेठ रोडवरील चामर लेणीकडे जाणाऱ्या मार्गावर किशोर ठाकरे यांची शेती आहे. यामध्ये केळी आणि पपईची लागवड केली आहे. बुधवारी (ता.२०) सकाळी साडे नऊ ते दहाच्या सुमारास म्हसरूळ पोलिस ठाण्यास या शेतातील विहिरीत अज्ञात व्यक्तींचा मृतदेह असल्याची माहिती शांताराम तिडके यांनी कळविली.

पोलिसांनी घटनास्थळी लागलीच धाव घेतली. सदर व्यक्तीचा मृतदेह तीन- चार दिवसांपासून यात पडून राहिला असल्याचा अंदाज पोलिसांनी वर्तविला आहे. तसेच विहिरीतील माशांनी चेहऱ्यावरील मास खाल्याने ओळख पटणे अवघड असून, पुढील तपास पोलिस करीत आहेत.