नाशिक :  लोकवस्ती नसताना दीड वर्षांपूर्वी गोदावरी नदीवर ३२ कोटींचे दोन पूल बांधण्यास दिलेल्या परवानगीवरून वाद शमत नसताना आता पुन्हा साडेतेरा कोटींचा तिसरा पूल बांधण्याचा प्रस्ताव स्थायी समितीवर सादर झाल्याने अनेकांच्या भुवया उंचावल्या आहेत.

गोदावरीवर ठराविक अंतराने एकाच रेषेत तीन पूल बांधण्यामागच्या भूमिकेमुळे सत्ताधारी भाजपवर संशय व्यक्त होत आहे. तरी या निमित्ताने मखमलाबाद शिवारातील जमिनींना चांगला भाव येऊन, या भागात नागरी वस्तीचा विस्तार होण्यास मदत होणार आहे. 

हेही वाचा >  एक हात बिबट्याच्या जबड्यात, तरीही चिमुकला थेट भिडलाच; 12 वर्षांच्या गौरवची धाडसी झुंज

आधी विरोध नंतर शांतता

२०१९ मध्ये स्थायी समितीने गोदावरीवर दोन पूल बांधण्यास मान्यता दिली होती. ज्या भागात नागरी वस्ती नसताना कोट्यवधीचा खर्च करण्याची गरज नसल्याची ओरड झाली होती. विरोधी पक्ष शिवसेनेसह भाजपच्या काही नगरसेवकांनीही पुलाला विरोध केला होता. आमदार प्रा. देवयानी फरांदे यांनी तर या भागाचा दौरा करून पुलाची गरज नसल्याचे मत व्यक्त केले होते. नवीन पुलांमुळे पूरपातळी वाढून शेजारच्या नागरी भागात पुराचे पाणी शिरून नागरिकांचे आर्थिक नुकसानीचा दावा केला होता. परंतु त्यानंतरही पुलाच्या कामाला मंजुरी देण्यात आली. त्यानंतर आमदार फरांदे यांनी ‘ब्र’ शब्द काढला नाही. मोरे मळा व जुने पंपिंग स्टेशनवरून नदीपलीकडे अशा दोन पुलांचे काम सुरू झाले आहे. हे कमी म्हणून की काय, आता पुन्हा मामामुंगी कार्यालयापासून मखमलाबाद शिवाराला जोडणारा नवा पूल तयार करण्यासाठी साडेतेरा कोटींचे प्राकलन ठेवल्याने कोविड काळात महापालिकेचे घटलेल्या उत्पन्नाचा प्रशासनाचा दावा फोल ठरत आहे. 

हेही वाचा >  काय बोलावं आता! जेव्हा न्यायाधिशांच्याच घरी होते चोरी; मुळासकट पुरावे नष्ट

पुन्हा बोरा चर्चेत 

सध्या सुरू असलेल्या दोन्ही पुलांचे काम मे. सीताराम इन्फ्राप्रोजेक्‍ट प्रायव्हेट लिमिटेड या कंपनीला मिळाले आहे. माजी पालकमंत्री गिरीश महाजन यांच्याशी संबंधित असलेल्या नीलेश बोरा नामक व्यक्ती पुलाचे काम सांभाळत असून, आता पुन्हा त्याच्या सूचनेवरूनच स्थायी समितीत तिसरा पूल उभारण्याचा प्रस्ताव सादर करण्यात आल्याची चर्चा आहे.