नाशिक : आंतरजिल्हा बदल्यांसाठी बनावट वैद्यकीय प्रमाणपत्र प्रकरणी दाखल गुन्ह्यात जिल्हा रुग्णालयाचे माजी अतिरिक्त जिल्हा शल्यचिकित्सक डॉ. किशोर श्रीवास यांना मुंबई उच्च न्यायालयाने अंतरिम अटकपूर्व जामीन मंजूर केला. ग्रामीण पोलिसांना १४ नोव्हेंबरपर्यंत डॉ. श्रीवास यांना अटक करता येणार असून, डॉ. श्रीवास व डॉ. निखिल सैंदाणे यांच्या जामीन अर्जावर १४ तारखेलाच सुनावणी होणार आहे. (Bogus Medical Certificate Case Dr Srinivas granted interim bail Nashik Crime News)

पोलिस कर्मचाऱ्यांना आंतरजिल्हा बदलीसाठी बनावट वैद्यकीय प्रमाणपत्र नाशिक ग्रामीण पोलिस अधीक्षक कार्यालयाकडे सादर केल्याप्रकरणी नाशिक तालुका पोलिस ठाण्यात गुन्हा दाखल करण्यात आला आहे. या प्रकरणी आत्तापर्यंत पाच जणांना अटक करण्यात आली आहे. नाशिक जिल्हा रुग्णालयाचे तत्कालीन अतिरिक्त जिल्हा शल्यचिकित्सक डॉ. किशोर श्रीवास, डॉ. निखिल सैंदाणे यांचे अटक पूर्व जामीन अर्ज जिल्हा न्यायालयाने फेटाळले.

त्यामुळे त्यांनी मुंबई उच्च न्यायालयात धाव घेतली आहे. डॉ. सैंदाणे यांच्या अटकपूर्व जामीन अर्जावर १४ नोव्हेंबर रोजी सुनावणी होणार आहे. डॉ. श्रीवास यांच्या अटकपूर्व जामीन अर्जावर झालेल्या सुनावणीत अंतरिम अटकपूर्व जामीन अर्ज मंजूर करण्यात आला आहे. मात्र त्यांच्या अर्जावरही १४ तारखेलाच सुनावणी होणार आहे. तोपर्यंत ग्रामीण पोलिसांना डॉ. श्रीवास यांना अटक करता येणार नाही.

बृहन्मुंबई, पालघर आणि जळगाव येथील २१ पोलिसांनी आंतरजिल्हा बदल्यांसाठी बनावट वैद्यकीय प्रमाणपत्र नाशिक ग्रामीण पोलिस अधीक्षक कार्यालयाकडे सादर केल्याचे समोर आल्यानंतर त्यासंदर्भात गुन्हा दाखल होऊन तपास सुरू आहे.

यात अधीक्षक कार्यालयातील वरिष्ठ लिपिकासह जिल्हा रुग्णालयात लिफ्टमन, खासगी डॉक्टर व त्याचा सहकाऱ्यास अटक करण्यात आली. डॉ. श्रीवास हे मंगळवारी (ता. १) जिल्हा शासकीय रुग्णालयात येत अधिकाऱ्यांच्या भेटी घेतल्या. दरम्यान, त्यांना अंतरिम जामीन असल्याने ते सेवेत रुजू होऊ शकत नसल्याचे सूत्रांनी सांगितले.