जुनी शेमळी (जि. नाशिक) : सुमारे आठ महिन्यांनंतर लॉकडाउन उठल्यावर बांधकामाला लागणाऱ्या विटांचा भाव आकारानुसार सात ते चौदा हजार रुपये असा दुप्पट झाला आहे. बांधकाम व्यवसाय जोमात सुरू असून, मजुरांअभावी बांधकाम करणे सामान्यांचे कंबरडे मोडणारे ठरणार आहे. 

व्यवसाय उशिरा सुरू झाल्याने टंचाई

लॉकडाउनच्या काळात बांधकाम ठप्प झाल्याने मजूर आपापल्या राज्यात गेले होते. अद्यापही काही मजूर आलेले नसल्याने स्थानिक ठिकाणी मजुरांना बांधकामासाठी एक हजार विटा पाडण्यासाठी ५६० रुपये भाव द्यावा लागत आहे. लॉकडाउनपूर्वी आधी लहान विटेला साडेचार हजार रुपये, मोठ्या विटेला नऊ हजार रुपये दर हजारी भाव होता. तर लॉकडाउननंतर अचानक भाव सात हजार, तर १४ हजारांपर्यंत म्हणजे दुप्पट झाला आहे. सध्या वीट मिळत नसल्याने व पाऊसही उशिरा चालल्यामुळे हा व्यवसाय उशिरा सुरू झाल्याने वीट उपलब्ध होत नसल्याचे चित्र आहे.

हेही वाचा - जेव्हा पोटच्या गोळ्यांसह मातेचे मृतदेह दिसले पाण्यावर तरंगताना; शेतकऱ्यांना भरला थरकाप

सर्वसामान्यांचे स्वप्न पूर्ण होणार की नाही?

लहान वीट सात बाय चार, तर मोठी वीट नऊ बाय पाच असते. हा व्यवसाय चालविण्यासाठी व वीट बनविण्यासाठी दगडी कोळसा, लाकूड, बॉयलर, काळी माती, जाड माती, राख खडवण, घेसू, खोके, पाणी, ट्रॉली, वाहतूक आदींचे भाव वधारले असून, पाण्यासाठी महिन्याचा कालावधी लागतो, तर वीट भाजण्यासाठी महिन्याचा कालावधी लागतो. वीट पाडण्यापासून तर वीट रचण्यासाठी मजूर व लागणारे साहित्य उपलब्ध होत नसल्यामुळे ठेकेदारांना व सामान्य नागरिकांना याचा फटका बसत आहे. महागाई वाढल्याने सर्वसामान्यांचे स्वप्न पूर्ण होणार की नाही, असा पेचप्रसंग निर्माण झाला आहे. 

हेही वाचा - वडिलांसोबतची लेकीची 'ती' ड्राईव्ह शेवटचीच; पित्याचा ह्रदय पिळवटून टाकणारा आक्रोश

लॉकडाउननंतर विटांचा भाव दुप्पट झाला आहे. याचा परिणाम बांधकाम व्यवसायावर झाला आहे. मजूर मिळत नसल्याने व्यवसायावरही परिणाम होत आहे. या व्यवसायाला लागणारे भागभांडवल मोठे आहे. लॉकडाउनच्या आधी ज्या ठेकेदारांनी कमी दरात बांधकाम घेतले आहे, त्यांना वीट न परवडणारी झाली आहे. 
- प्रकाश कुंभार, व्यावसायिक