नाशिक : शहरात रॅपिड ॲन्टिजेन किटचा तुटवडा भासू लागल्यानंतर महापालिकेने नोंदविलेल्या नवीन २५ हजार ऑर्डरपैकी पाच हजार किट महापालिकेला प्राप्त झाल्या. जळगाव महापालिका व सिव्हिल हॉस्पिटलला दिलेल्या अठरा हजार किटपैकी अडीच हजार किट नाशिक महापालिकेला परत मिळाल्या. मात्र, त्या खराब असल्याचा दावा करण्यात आला आहे. 

प्रशासनाकडून दाव्याचे खंडन 

प्रशासनाकडून याचे खंडन करताना वेगळ्या कंपनीच्या किट आल्याने त्या वापरण्याची पद्धत वेगळी असल्याचे स्पष्टीकरण दिले आहे. नाशिक महापालिकेने एक लाख रॅपिड ॲन्टिजेन किट मागविल्या होत्या. २४ जुलैपासून शहरात मिशन झीरो अभियान राबविताना त्यात मोठ्या प्रमाणात या किटचा उपयोग झाला. परंतु त्याच काळात जळगाव शहर व जिल्ह्यात कोरोना रुग्णांची संख्या वाढल्याने तेथील जिल्हाधिकारी, सिव्हिल सर्जन व महापालिका आयुक्तांकडून महापालिकेकडे रॅपिड किटची मागणी करण्यात आली होती. 

हेही वाचा > ह्रदयद्रावक! मोबाईल मिळेना म्हणून भितीपोटी विद्यार्थीनीची आत्महत्या; ऑनलाइन शिक्षणाचा आणखी एक बळी

अठरा हजार किटवरून राजकारण रंगले

मानवी दृष्टिकोनातून नाशिक महापालिकेने अठरा हजार किट दिल्याने त्यावरून राजकारण रंगले. महापालिका प्रशासनाने कोणाची परवानगी घेतली, किटबाबत विचारणा केली का, असे अनेक प्रश्न स्थायी समितीमध्ये विचारण्यात आले. प्रशासनाने जळगावसाठी दिलेल्या किटपैकी अडीच हजार किट परत आल्या. नाशिक महापालिकेने ऑर्डर दिलेल्या २५ हजारांपैकी पाच हजार किट प्राप्त झाल्याचे स्पष्टीकरण दिले.

हेही वाचा > संतापजनक! कोरोनाबाधित महिलेचा सफाई कर्मचाऱ्याकडून विनयभंग; घटनेनंतर रुग्णालयात खळबळ

संपादन - किशोरी वाघ