नाशिक : गांजा अन्‌ दारूच्या नशेत झिंग झालेल्या संशयितावर भटका कुत्रा भुंकला. भुंकणार्या कुत्र्यावर झिंगाट असलेल्या संशयिताने दगड भिरकावला. दगड कुत्र्याला लागला नाही, पण त्याचा राग संशयिताने रस्त्यालगत पार्क केलेल्या चारचाकी वाहनांवर काढत दगड मारून काचा फोडल्या.

या झिंगाट संशयिताला शहर गुन्हेशाखेच्या युनिट दोनच्या पथकाने अटक केली आहे. आकाश निवृत्ती जगताप (२१, रा. एमएचबी कॉलनी, सातपूर) असे संशयिताचे नाव आहे. (Cars windows smashed police arrested drunkard man Nashik Crime News)

हेही वाचा : शेअर बाजारात सततचे लाॅसेस? मग यापैकी कुठली चूक होतेय? घ्या जाणून

सातपूर कॉलनीत गेल्या मंगळवारी (ता. १७) रात्री रवींद्र श्रीकृष्ण सगरे यांच्या वॅगेनार कारची (एमएच १५ इबी २७३०) तर, रुबी संजिद आलमशाह यांच्या ह्युंडाई कारची (एमएच १५ डीएम १४६५) काच फोडल्याची घटना घडली होती. याप्रकरणी सातपूर पोलिसात अज्ञाताविरोधात गुन्हा दाखल करण्यात आला होता.

सातपूर पोलिसांसह शहर गुन्हेशाखा युनिट दोनचे पथक या गुन्ह्यांचा समांतर तपास करीत होते. युनिट दोनचे हवालदार राजेंद्र घुमरे, संजय सानप यांनी परिसरातील सीसीटीव्हीच्या आधारे तपास करीत असताना संशयित आकाश जगताप यांची माहिती मिळाली.

पोलिसांनी आकाशला चौकशीसाठी ताब्यात घेतल्यानंतर त्याने गुन्ह्याची कबुली दिली. पुढच्या कारवाईसाठी त्यास सातपूर पोलिसांच्या ताब्यात देण्यात आले आहे.

सदरील कामगिरी आयुक्त अंकुश शिंदे, उपायुक्त प्रशांत बच्छाव यांच्या मार्गदर्शनाखाली युनिट दोनचे वरिष्ठ पोलीस निरीक्षक आनंदा वाघ, उपनिरीक्षक पोपट कारवाळ, यशवंत बेंडकोळी, राजेंद्र घुमरे, संजय सानप, सुनील आहेर प्रशांत वालझाडे, संतोष ठाकूर यांनी बजावली.