नाशिक : 'कसं काय पाटील बरं हाय का?'...काल काय ऐकलं ते खरं आहे का?...असं विचारण्याची वेळ सध्या चांदवडकरांवर आली आहे. निमित्त आहे समाजमाध्यमांत देवरगाव (ता. चांदवड) येथील पोलीस पाटील या शासनाच्या सेवकाने केलेल्या अश्लील शेरेबाजीचे...या पोलीस पाटलाला अश्लील शेरेबाजी भोवणार असल्याचे चित्र सद्या बघायला मिळत आहे.

नेमके काय घडले?

पोलीस पाटील म्हंटल की, गावची कायदा सुव्यवस्था राखण्यात मोलाची कामगिरी बजावणारा घटक. शासनाच्या या सेवकाकडून निरपेक्षपणे काम अपेक्षित असते मात्र ते दुरच पण थेट कायदा सुव्यवस्थेचा प्रश्नच उपस्थित होईल असे वर्तन केलंय माणिक शिंदे या देवरगाव (ता. चांदवड) येथील पोलीस पाटलांनी. अठरा "गावांचा राजपूत बाणा-01" या व्हाटसप ग्रुपवर त्यांनी राष्ट्रवादी काँग्रेसचे सर्वेसर्वा शरदचंद्र पवार यांच्यावर अश्लील टिप्पणी केली. सदर टिप्पणीचे स्क्रीनशॉट राष्ट्रवादी काँग्रेस चांदवड पदाधिकाऱ्यांच्या हाती लागताच शासनाचा सेवक असलेल्या या पोलीस पाटलावर कारवाई होऊन त्याचे निलंबन करण्याची मागणी त्यांनी चांदवड प्रांताधिकारी सिद्धार्थ भंडारे, पोलीस निरीक्षक हिरालाल पाटील यांच्याकडे केली आहे. निवेदनावर दत्तात्रेय वाकचौरे, सुनील आहेर, नवनाथ आहेर, विक्रम जगताप, दीपक शिंदे, दशरथ ठाकरे, संदीप शिरसाठ, सुनील शिरसाठ, शशिकांत शिरसाठ, योगेश जाधव, संभाजी जाधव, बाळू जाधव, दीपक जाधव, ओमकार जाधव आदी राष्ट्रवादी पदाधिकारी, कार्यकर्ते यांच्या सह्या आहेत.

हेही वाचा > धक्कादायक! खासगी रुग्णालयांकडून कोविड उपचारात अनियमितता... कारवाईची शक्यता

विशेष म्हणजे ही शेरेबाजी थेट शरद पवार यांच्यावर केली गेल्याने राष्ट्रवादी काँग्रेसचे कार्यकर्ते-पदाधिकारी संतापले असून पोलीस पाटलाला तात्काळ पदावरून हटविण्याची मागणी प्रांताधिकारी सिद्धार्थ भंडारे यांच्याकडे केली आहे. दरम्यान शासकीय पदावर राहून राजकीय तसेच असंविधानिक शब्द वापरून कायदा सुव्यवस्थेचा प्रश्न निर्माण होईल अशी परिस्थिती निर्माण करणाऱ्या पोलीस पाटलावर प्रशासन काय कारवाई करेल याकडे तालुक्याचे लक्ष लागून आहे.

हेही वाचा > अखेर जिल्ह्यात 'हा' पर्याय वापरुन भातांच्या रोपांची लागवड...वाचा सविस्तर बातमी